【聲明】港生活網站並無進行電話推廣活動

下月開騷視為紅館前奏 吳浩康︰報答團隊無放棄我

發佈時間: 2019/11/15

相隔兩年,吳浩康(Deep)將於下月30日在旺角麥花臣場館,舉行《DEEP 2019+1吳浩康演唱會》,回饋粉絲。入行17年的Deep儲落不少歌曲,他坦言視今次演出為前奏,希望早日實現踏上紅館舞台的夢想。

吳浩康今次個唱以「2019+1」為主題,源於Deep在今年年頭與公司團隊訂立目標,希望今年內舉辦一個演唱會,不管任何場地。Deep說︰「過往開嘅騷累積咗唔同經驗,而且呢段時間都製作咗一啲新歌,好想用新嘅rundown去表演,呈現喺觀眾眼前。」不過他與製作團隊花了幾乎一年時間,都物色不到檔期,惟有靜待機會︰「好巧合喺2019年尾二嗰日有合適場地,所以今次演唱會可以好好咁紀念由年頭到年尾、一齊並肩作戰嘅團隊,報答佢哋無放棄,兼且付出最大嘅心血。」

自演唱會消息公布後,忠實歌迷都喜歡麥花臣場地舞台距離夠近,更希望Deep可以演繹過去多年的side track作品。對於歌迷想聽「冷門歌」,Deep笑言意見「收到晒」,會盡量調整歌單,滿足歌迷意願︰「喺我心目中,我嘅歌迷先係當晚嘅主角。」

冧爆情歌贈樂迷

除了積極練歌,Deep近日更嘗試接觸山地單車,他說︰「呢樣係好高強度嘅帶氧運動,對強化心肺好有效,我想好好操fit自己,到時以最佳狀態見大家。」另外,Deep同時推出全新唱作歌曲《愛沒懷疑》,更由他親自作曲。Deep多年來唱過不少慘情歌,今次新歌是少有講述甜蜜愛情故事,希望這首幸福滿瀉的冧爆情歌,為樂迷帶來新鮮感。

撰文︰Pauline

編輯︰李潔盈

美術︰顏玉玲

吳浩康預告會唱不少冷門歌,滿足歌迷要求。