苑瓊丹做主持爆料 講明得啖笑

苑瓊丹（苑仔）主持開電視新節目《開工大吉77》，昨日進行錄影。苑仔曾於08年在電台節目踢爆圈中出現「魔術鹹豬手」，經傳媒起底後成為全城熱話，苑仔強調如今以披露趣聞為主，以免「禍從口出」。

苑仔當年在電台節目《瘋SHOW快活人》爆料，指TVB出現「魔術鹹豬手」，有男星借變魔術為名，假裝不小心觸碰女藝人，雖然她沒有開名，卻依然引起軒然大波。苑仔曾誓言不再主持同類型節目，但事隔多年，苑仔再度「出山」主持26集新節目。

昨日請來已轉做武術導演的前藝人羅天池擔任嘉賓，提到節目有爆料環節，苑仔笑言︰「以前搞到人哋雞毛鴨血，今次爆啲可以接受、開心嘢，曾經講過唔再做呢啲爆料節目，但呢個節目真係得意同有趣。」

老公唔使日日見

節目除揭露藝人趣事外，亦會解構幕後工作人員的八卦趣聞，苑仔解釋︰「好似茶水阿姐、道具手足、燈光師、導演、收音師同攝影師等，我都想知佢哋做啲咩，令到娛樂圈唔再神秘。」

苑仔既忙於做主持，又要打理生意，問她可有遭老公投訴？她笑指︰「老公唔使我陪，佢成日唔喺香港，我又經常周圍走，我哋感情昇華到另一階段，見唔到都等於見到。」

撰文︰倪小珊

編輯︰陳禮恒

美術︰梁政敏

攝影︰林良明