2012年港姐季軍朱千雪一向深得大眾喜愛，可以話係近年最有觀眾緣嘅女電視演員。近日有網民開Post話記錯千雪BB係冠軍人馬，引嚟唔少人回應指有同樣嘅錯誤記憶！唔通係「曼德拉效應」？
（朱千雪IG）
其實千雪BB當年係香港小姐冠軍大熱人選，2012年係第一次玩全民投票揀冠軍，走勢凌厲嘅佢，當時都獲現場唔少藝人投下佢神聖嘅一票，點知人算不如天算，最後因太多人投票Server死咗，普選港姐「流產」，最終沿用番本身嘅賽制，選出冠軍張名雅同亞軍黃心穎，千雪終只得季軍，卻因此得「民選港姐」、「民選冠軍」嘅封號。可能就係因為大家呢個主觀願望太強烈，最終產生咗呢個錯覺！
（朱千雪IG）
雖然千雪BB只有季軍，但佢隨即得到好多演出機會，同王浩信合作拍《踩過界》更大獲好評。原本留喺電視圈發展一定大有作為，但佢2017年毅然向無綫請假回歸校園，於中大修畢企業傳播管理碩士課程後，近年再於香港城市大學攻讀法律博士課程。
（網上圖片）
朱千雪被稱為「學霸」才女，但佢坦言細個唔鍾意讀書。當年佢舉家移民加拿大溫哥華，入讀三年級，不過由於「一個英文都唔識」，無法與其他同學交流，故2年都識不到朋友。
佢由細個已對事事好奇，參加過無數課外活動，如國語、繪畫、溜冰、劍擊和游泳等，不過佢話對呢啲都冇太大興趣，仲希望快啲做大人，擺脫讀書嘅束縛。隨個性變得成熟，佢慶幸當年得到咁多機會，不單英文，都精通國語、法文。千雪認為唔應該為讀書而讀書，佢係覺得所學嘅嘢不夠用，先想去增值自己，甚至笑言以前覺得能畢業便算，但現在溫書、讀書，係希望有天能派上用場。千雪BB嘅知性氣質係由裡面滲出嚟，真係扮都扮唔到！
（朱千雪IG）
唔知係咪太掛住佢嘅關係，近日有網民肉搜千雪BB，發現香港大律師公會嘅網頁，執業大律師名冊裡面嘅實習大律師一列中，有一名朱千雪女士正喺金鐘一間Chambers實習，同之前指佢已獲位於金鐘全港五大律師行之一為佢預留職位嘅消息脗合，簡直係新世代女性嘅偶像呀！
（朱千雪IG）
千雪仲事業愛情兩得意，今年年中同醫生男朋友Justin拉埋天窗。千雪主動向傳媒指二人係世交兼青梅竹馬，自小認識，相知相交，後來長大成為好友，演變到今日的婚姻關係，真係童話故事一樣，羨煞旁人。
撰文：黃蘊姿
