現年61歲嘅恬妞70年代開始活躍於電影界，77年已獲得金馬獎最佳女主角獎同巴拿馬國際影展最佳女主角獎，事業上嶄露頭角。恬妞於1984與第一任丈夫葉聰豪結婚，正當以為搵到幸福嘅時候，驚覺男方有兩個老婆，但當其時佢已經有咗BB，決定生咗阿女先離婚。為免家人擔心，佢一直都係自己一個承受，好遲先向家人和盤托出。
恬妞憑《蒂蒂日記》獲第15屆金馬獎最佳女主角獎。（網上圖片）
「我希望每個人都開心，見到對方開心，我都會快樂。呢個已經成為我嘅習慣。我最在乎就係人哋感受，人哋嘅喜怒哀樂，我係最在乎嘅。」佢永遠以人為先嘅性格並冇為佢帶嚟好運。1988年恬妞同萬梓良因為多次合作而擦出愛火花，終於1992年二人結婚，當時萬梓良向恬妞發表愛的宣言--「三個人一條命」，誓言照顧太太，都會對佢同前夫所生嘅女視如己出，婚禮過程無線更作現場直播，成為一時佳話。
二人當年嘅直播婚禮有好多紅星到賀。（網上圖片）
不過四年後，恬妞話二人因性格不合而離婚，冇講過男方半句不是，冇半句怨言。不過離婚幾年後，萬梓良公開坦承自己對唔住恬妞，自此以後各行各路。恬妞此後為要供阿女去瑞士讀書，一直逼自己工作，幾乎沒有休息過，除受傷或卧病在床，她都未有停過拍戲。
萬梓良2002年再娶細16年嘅內地嬌妻。（東星娛樂）
最初離婚，恬妞覺得自己好想拍拖有人追，但後來佢又有另一種想法：「因為我覺得生命中唔需要嗰一部分，我唔需要丈夫呢一部分，但可能我需要一位傾得埋嘅朋友，但係瞓覺嘅時間都係你返自己屋企，我喺自己屋企，已經唔習慣身邊有另外一把聲，或者另外一個物體喺度。」
恬妞同阿女相依為命。（恬妞微博）
恬妞亦講兩段婚姻佢都冇指望要男方照顧佢，除咗佗住阿女到之後休養嘅一年半，佢每一日都喺度工作。或者就係佢咁剛強嘅性格幫佢捱過呢一切，亦令佢覺得佢唔再需要有老公，都可以撐起半邊天。
（恬妞女兒微博）
離婚22年，佢同前夫萬梓良都冇再碰過面，但三年前，受奇妙嘅緣份使然，二人喺一列大陸火車上重逢： 「佢好似住廣州，佢喺廣州上車，我去深圳拍戲，就係咁樣遇到，到埋嚟打招呼，嚇我一跳，然後佢就開始不停講嘢，由嗰時間始，我哋就有對方聯絡電話。」恬妞話自此以後每年萬梓良都會祝佢新年快樂，除此之外，就冇其他聯絡。娓娓道來嘅時候，已經好似講緊其他人嘅故事，非常淡淡然。
萬梓良近照（微博圖片）
撰文: 黃蘊姿