【李小龍指定替身】元華輩份高過成龍低調耕耘 69歲武夫柔情專一愛妻30年

喺電影同電視劇都經常見到元華嘅身影，動靜皆宜嘅佢武戲出色不在話下，喺《封神榜》中飾演托塔天王李靖嘅感情戲同樣令人深刻；而電影《功夫》入面嘅小男人包租公搞笑戲份亦入木三分，係一個多功能又討好嘅演員。

{{hket:inline-image name="4014000095o828s8oo80.jpg"}}{{/hket:inline-image}}

《封神榜》電視截圖

{{hket:inline-image name="pKmAw3-15.jpg"}}{{/hket:inline-image}}

《功夫》電影截圖

其實除咗幕前演出，現年69歲嘅元華一直擔任龍虎武師，係真正的幕後英雄，銀幕上唔少巨星都係由佢做替身代為演出，先至表現到咁身手不凡。元華係「七小福」之一，7、8歲開始跟隨師傅于占元學習功夫，同元秋、元奎、元彪、成龍以及洪金寶等同為「七小福」成員。元華第一次參演嘅電影係《精武門》，亦係擔任李小龍翻跟斗嘅指定替身。

{{hket:inline-image name="rDed-htptaqf3536756.jpg"}}{{/hket:inline-image}}

《精武門》電影截圖

元華指李小龍熱愛中國功夫、喜歡挑戰武術界限，而且亦好關心跟佢搵食嘅一眾武師，經常會親自向老闆為佢哋爭取福利。佢表示之所以會成為李小龍御用替身，係因為李小龍屬於練拳腳功夫，而佢自己係練舞台，拳腳喺鏡頭前打唔一定好睇。

{{hket:inline-image name="MPW2525_A040-041_007_crop.jpg"}}{{/hket:inline-image}}

成龍（右）係元華嘅師弟。（網上圖片）

身為成龍以及洪金寶嘅同門，演藝事業並冇好似佢哋咁大紅大紫，但佢就樂得自由自在，亦未有好似佢師兄師弟成立班底（洪家班與成家班）。不過默默耕耘嘅佢都非常多產，終於喺2005年憑電影《功夫》奪得香港電影金像獎及香港電影金紫荊獎最佳男配角，多年付出獲得肯定。

{{hket:inline-image name="TUNGSTAR6077790.jpg"}}{{/hket:inline-image}}

東星娛樂

「七小福」裹面，成龍同大師兄洪金寶都不時同身邊嘅女性傳緋聞。 但身為二師兄嘅元華就好專一，同老婆結咗婚超過三十年都依然好恩愛。據知佢嘅一對仔女都喺外國生活，所以都係得佢兩公婆一齊留港生活。元華經常都被影到同太太一齊出街撐枱腳，雖然佢哋係結婚多年嘅老夫老妻，但元華出街都會拖實老婆雙手唔放，形影不離，非常sweet ！

撰文: 黃蘊姿