42度拍《阿爺廚房》外景 李家鼎勁驚爆血管

李家鼎（鼎爺）與譚玉瑛（阿譚）主持的《阿爺廚房》已播映三輯，深受觀眾歡迎，新一輯節目將於下周一晚播映。兩位主持昨日出席記者會，鼎爺透露為節目拍外景時，因天氣太熱，一度看見重影，令他擔心自己爆血管。

李家鼎與譚玉瑛今輯走訪澳門、順德及南海拍外景，由於拍攝時正值炎夏，習慣出入廚房的鼎爺大呻頂唔順：「當時氣溫42度，我哋已經下晝四點半拍外景，都好似入咗麵包爐咁，攝影師都話攝影機熱到郁唔到。」阿譚則大爆鼎爺曾將光頭貼在大型冷氣機風口上狂吹「散熱」，問鼎爺是否擔心中暑？他笑說：「我係驚爆血管呀，嗰下睇嘢直情見到兩、三重人影，足足吹咗十幾20分鐘。」不敢再拍外景？他笑說：「又無呢回事，我哋簽咗賣身契㗎嘛。」

應要求煮家常菜

提到今輯最難忘的美食，阿譚表示是在荷花池生食蓮藕，鼎爺聞言說：「拍嗰陣感覺好似『採紅菱』咁浪漫，但畫面睇起嚟好似兩隻妖怪！」阿譚笑說：「真係好難得，拍到粧都溶埋，第一次有化粧師幫我撲番酒店拎化粧品。」阿譚表示新一輯會應觀眾要求，將菜式化繁為簡，以家常菜為主，而鼎爺表示依然會十分講究。

撰文︰Pauline

攝影︰林良明

編輯：李潔盈

美術：李明