捐贈舊衣對抗全球暖化 齊減廢救救聖誕老人

又到聖誕，又到聖誕，換上嶄新冬衣去聖誕派對，再自然不過。不過，很多人都無諗過，身上時款有型嘅冬衣，同堆滿聖誕樹前嘅聖誕禮物，最終歸處很可能係堆填區。成日換新衫，更可能最終導致聖誕老人都要「失業」﹗

黛安同地球之友嘅公關姊妹傾開，知道原來速食時裝文化同全球暖化息息相關，尤其現代人「喜新厭舊」，習慣「買一件丟一件」，結果呢啲被遺棄嘅衣物絕大部分都「落腳」堆填區，唔單止要用上逾200年時間分解，分解過程仲會釋放大量甲烷、二氧化碳等溫室氣體，加劇全球暖化。住喺北極圈嘅聖誕老人，不但家園面臨溶化威脅，仲因為極地冬季變暖，令降雪變成降雨，將野生動物嘅食物凍結成冰，隨時令馴鹿都無啖好食。

公關姊妹又提醒，「亂丟衫」不單係全球普遍現象，香港人都有責任，因為現時香港每日最少有370噸紡織廢料被運到堆填區，等於丟咗260萬件T-shirt；據2018年Quantis研究報告指，時裝業每年都釋放佔全球總量8%嘅溫室氣體，等同排放近40億公噸二氧化碳。

想改變現狀，過有意義聖誕，記住要支持地球之友嘅「Save Our Santa-捐衣減廢大行動」，即日起至本月底積極捐衫，機構除會轉贈畀有需要人士，仲會送去環保工廠，將舊衫升級成再造紗綫，再製成新衣㗎。