【聲明】港生活網站並無進行電話推廣活動

否認100萬利誘老婆生B 郭富城︰話我追仔係荒謬

發佈時間: 2019/12/09

育有兩個女兒的天王郭富城(城城),近日盛傳想追「慈菇椗」,更指他以100萬元利誘太太方媛(Moka)為他生仔。城城昨日單拖現身沙田馬場時,強調沒有追仔打算,力斥傳聞荒謬。

郭富城昨日以品牌大使身份,到馬場出席「浪琴表香港國際賽事」。對於有傳恨追仔一事,城城即反問︰「邊度聽嚟嘅消息?有啲傳媒都鍾意創作,但係從來無問過我意見。我有兩個女已經好開心、好幸福,暫時無呢個(生仔)計劃,唔好再畀呢啲報道妖言惑眾。」

未帶囡囡見愛駒

有指城城以100萬元給老婆作生仔獎勵,他說︰「呢啲事唔係用錢去衡量,唔係買賣,婚姻係一生承諾,建立幸福家庭用錢買好怪。兩個小朋友已經花好多時間照顧,太太又忙佢嘅時裝生意,暫時都唔考慮追仔,話我追仔係荒謬,女有女好,好sweet,我唔係舊式思想。」提到日前被拍到去買花,問他是否買來送給太太?他笑說︰「女仔都鍾意花,希望收到花嘅都好開心,其實我平時經常去買,只係無畀你哋影到啫。」

另外,上周城城的愛駒「舞士精神」勝出頭馬,城城開心說︰「好多香港馬迷支持,不負眾望,贏咗係開心,但大家都唔好孤注一擲。我無投注,因為我已經係馬主,贏咗有彩金。」他笑言喜歡愛駒似自己一樣有鬥心,問到「舞士精神」何時衝出香港參賽?他說︰「一步一步嚟,由四班升到三班,係叻仔,六場有三個冠軍,三個第二,已經好開心。」帶兩個囡囡見愛駒?他說︰「未呀,之前太忙,而且怕囡囡細個會驚,等佢哋大少少先。」

採訪︰Pauline

編輯︰李潔盈

美術︰梁政敏

否認100萬利誘老婆生B 郭富城︰話我追仔係荒謬

郭富城經常花心思給太太方媛驚喜。(資料圖片)