【聲明】港生活網站並無進行電話推廣活動

賽馬會流金匯智能化 助老友記活得健康

發佈時間: 2019/12/09

黛安覺得,長壽最緊要活得健康。想老咗都keep住體魄,就要去大埔嘅「賽馬會流金匯」啦。

聽公關姊妹講,原來適逢「賽馬會流金匯」成立10周年,今年全面翻新,好多設備都Level up,包括引入嶄新嘅智能運動系統Smart Fit。

呢套系統採用航天科技,內置多項自動調節功能,可防止使用者喺運動過程中受傷,夠晒安全,加上系統嘅自我管理功能,可以幫到長者記錄當日運動表現同身體狀況,方便佢哋審視自己嘅狀態調整訓練節奏,做到強健體魄,兼延緩衰老㖭!

姊妹仲話,「賽馬會流金匯」係全港首間引入Smart Fit系統嘅機構,今個月中舉辦嘅開放日會首度向公眾展示儀器。另外,中心除咗添置新設備,仲擴大咗活動空間,並推出咗護士諮詢、互動復康訓練等新服務,以支援長者家居安老。

而中心嘅跨界別專業團隊,包括護士、中醫、物理治療師、健身教練、營養師同社工,都會為長者提供個案跟進服務,做到「防病」效果,幫老友記愈活愈「有營」。

撰文: 黛安 消息特靈八卦公關
欄名: 八卦名利場