港隊馬術代表 亞洲團體賽歷史性奪冠

本港馬術選手，又再為香港增光喇！賽馬會公關姊妹透露，馬會馬術隊騎手鄭文傑、賴楨敏、林立信同梁巧羚，喺泰國芭堤雅舉行嘅首屆國際馬聯亞洲錦標賽中，奪得場地障礙賽團體賽金牌，係香港歷史性首次奪得場地障礙賽團體金牌，連埋個人獎項，總共取得一金三銀一銅佳績！

黛安知道，馬術場地障礙賽團體賽賽事由上星期三（4日）展開，喺亞洲區內規模僅次於亞運會嘅大型馬術運動會！今屆有來自13個國家同地區嘅騎手及馬匹參與，當中4名代表香港出賽嘅馬會馬術隊騎手表現出色，林立信、梁巧羚及鄭文傑更分別做出「零罰分」，包攬團體賽計算成績最好前3名，最終香港隊力壓菲律賓同科威特勇奪場地障礙賽團體賽金牌！

而鄭文傑同梁巧羚喺最後一日嘅個人賽事中，仲分奪銀牌及銅牌，令香港隊順利喺錦標賽參與嘅比賽項目中全部「有牌落袋」，非常出色！