吳志雄出身江湖，經典港產電影《古惑仔》陳浩南嘅故事就係以佢為藍本。吳志雄一手催生《古惑仔》電影同漫畫，將自己數十年嘅古惑仔打拼生涯融入劇情，大B哥、陳浩南以及片中不同角色其實都有佢嘅影子。多年來佢行走娛樂圈同黑道之間，與周潤發、古天樂、成龍等巨星稱兄道弟，亦曾因欠債累累，避走內地，佢嘅一生可以話非常傳奇。
（網上圖片）
（志雄微博）
（《古惑仔》截圖）
「以前出嚟行，隨時遇到仇家，真係兩把刀未離過身，老婆擔心到每晚裝香保平安。」志雄做得古惑仔少不免會行差踏錯，吳志雄亦曾經因為犯事入獄，坐監期間，太太臨盆在即問吳志雄如果佢死了，佢一個女人仔點算？於是吳志雄猛然醒覺自己承擔照顧家人嘅責任。太太一句話，令佢下定決心脫離黑社會。
（志雄微博）
志雄哥話自己未結婚時至少十個八個女朋友，但志雄哥認定阿嫂一個:「斯文、大方得體，又唔鍾意講嘢，同其他好唔同，佢又唔識飲酒。英雄難過美人關，又靚又純，好適合我家庭，照顧我父母各樣。尤其是江湖人，有個女人睇住屋企OK嘅。」義氣行頭嘅志雄哥，身上有一百蚊，就會分五十蚊畀佢嘅兄弟，志雄嫂都有微言：「做志雄女人好難，十分之難，要顧好多嘢。」
（網上圖片）
志雄嫂話當年每晚都要見到志雄哥返嚟先瞓得著，但志雄哥成日瞓瞓吓又出去做嘢，心情日日都好似過山車咁，真係量度少啲都做唔到阿嫂。幸好依家志雄嫂苦盡甘來，志雄哥一得閒就家庭樂：「佢一直都好錫我，總之我話睇中咩嘢，我就有，後生時都係咁，我依家唔夠膽講話鍾意一樣嘢，唔係佢又買咗，真係要睇定中意我先講囉，一開口就有架喇。」真係冧到隔籬都糖尿。
（志雄微博）
1987年志雄哥透過主演電影《監獄風雲》而進入電影圈，大家先有機會認識佢。吳志雄一呼百應，電影中嘅臨時演員過半係佢嘅江湖兄弟。不過令志雄哥全心投入電影圈嘅係《古惑仔》。《古惑仔》漫畫由吳志雄於1990年一手策劃，後來更拍成同名電影。《古惑仔》令志雄名利雙收，但99年志雄投資失利令佢負債累累，人生跌至谷底。
（《監獄風雲》截圖）
2000年尾志雄哥帶住僅餘嘅200港紙，隻身去到大陸投靠開飯店嘅朋友。後來又喺東莞、深圳結識咗一班朋友，開始喺內地投資生意，中港兩邊走搵錢兼去唔同城市登台演出。志雄哥話香港觀眾反而忘記佢演嘅角色，但大陸觀眾就對佢印象深刻，令佢大受歡迎。
（志雄微博）
（志雄微博）
志雄哥亦對古天樂心存感激，因為當時古天樂幫佢還咗一大筆債，志雄哥指古天樂喺佢最困難嘅時候一直支持佢。古天樂幫他，係因為古天樂被封殺期間，志雄義無反顧搵佢接拍多部電影，結果到自己落難時，古天樂亦出手相助。
阿女似足阿媽後生，好靚女。（志雄微博）
吳志雄雖然外表粗豪，但對住阿女柔情似水。充滿江湖味嘅雙鷹紋身中，竟發現係家人嘅名：「以前細女問我咩嚟，我話係花，用來紀念」。至於以吳志雄與阿女嘅父女情作藍本嘅電影《一個好爸爸》中，古天樂為愛女將心口嘅猛虎改成Hello Kitty，原來現實生活中嘅志雄都因為愛女改咗三次紋身。
（志雄微博）
撰文: 黃蘊姿