C君娶黃天頤星級兄弟好幫得手 破格江湖味「愛的誓言」抱得老婆歸

農夫成員C君（鄭詩君）今日（13日）迎娶拍拖5年嘅港台DJ女友黃天頤，於中環四季酒店設宴。中午C君着上一身傳統馬褂，率領一眾星級兄弟團去酒店接新娘。

{{hket:inline-image name="20191213-DSC_4671.jpg"}}{{/hket:inline-image}}

兄弟團陣容鼎盛，包括陸永、蕭正楠、黃翠如、洪永城等，而大妗姐一角真係估佢唔到，竟然搵嚟唐詩詠擔任。唐詩詠按傳統喺C君接新娘嘅時候幫手擔遮，C君仲口痕大搞食字爛Gag，話詩詠係「姐仔擔遮仔」，真係有C君就永冇冷場呀。

{{hket:inline-image name="20191213-DSC_5434.jpg"}}{{/hket:inline-image}}

{{hket:inline-image name="20191213-DSC_4623.jpg"}}{{/hket:inline-image}}

兄弟團到達新娘房唔少得畀開門利是，一眾姊妹一度提出九千九百九十萬嘅銀碼，C君聽到銀碼後即表示：「你哋要呢個數，李嘉誠都娶唔到老婆啦。」之後蕭正楠馬上向各兄弟籌集利是錢，陸永突然大聲呼叫:「嘩，真係厚到利是封都擺唔落呀。」原來佢哋用銀紙包住一包紙巾，姊妹們發現梗係起哄，蕭正楠就搞笑地話佢老婆黃翠如都係得入面嗰包。經過一輪議價後，C君以一封「開心大利是」順利過關。

{{hket:inline-image name="20191213-DSC_4663.jpg"}}{{/hket:inline-image}}

之後C君同兄弟團要接受3個遊戲考驗，第一個遊戲是要穿上美少女戰士服飾，模仿美少女戰士變身，做得藝人都係扮鬼扮馬開，自然輕易過關！第二個遊戲，C君要戴上眼罩，用口幫兄弟搽唇膏，兄弟們再用嘴將一塊心形嘅透明膠片傳送。

{{hket:inline-image name="20191213-DSC_4896.jpg"}}{{/hket:inline-image}}

{{hket:inline-image name="20191213-DSC_4946.jpg"}}{{/hket:inline-image}}

最後一個遊戲就考驗兄弟們體力，首先C君瞓地，兄弟再喺佢上面一邊口含梳打餅一邊做掌上壓，每做9下就要講一句恭賀說話，新郎哥最終被噴到一面一頭都係餅碎。

{{hket:inline-image name="20191213-DSC_5033.jpg"}}{{/hket:inline-image}}

最後就係例牌整喊新娘嘅愛的宣言環節，但C君就一改傳統，表示自己所寫嘅係與別不同嘅「愛的誓言」，他表示：「天頤婚前一直都唔畀我叫老婆、太太，就算有人叫佢做C君老婆，佢都第一時間否認，強調只係我女朋友，不過過咗今日可以每日叫你老婆喇。一直以嚟好多新人都係讀愛的宣言，但係宣言係可以改或者唔算數，我自己度咗一段愛的誓言。」

「你我夫妻二人，今日同牀共枕，終生肝膽相照，忠心義氣，發財到尾，如果為夫奸心反骨，有始無終，神昭其上，鬼鬫其旁，三刀六眼，五雷轟頂，人神共鑒。」

天頤喺房內聽到充滿江湖味嘅誓言笑得好開心，但就似乎唔多收貨，C君就承諾「真感動」嘅愛的宣言預咗喺證婚嘅時候會講一大堆，會講到12點，非常搞笑！C君成功抱得老婆歸，不過一對新人表現含蓄，C君只輕錫老婆面頰一下。

{{hket:inline-image name="20191213-DSC_5207.jpg"}}{{/hket:inline-image}}

{{hket:inline-image name="20191213-DSC_5394.jpg"}}{{/hket:inline-image}}

以上圖片由大會提供

撰文：黃蘊姿