近年好少喺熒光幕出現嘅「Ming Sir」劉兆銘，早前巧遇曾喺《七姊妹》中飾演佢個女嘅郭少芸。精神奕奕嘅Ming Sir望落一啲都唔似89歲，唔少網民更留言話好希望再睇到佢嘅演出。
（郭少芸Facebook）
Ming Sir之前有5年時間完全停產，事關2012年佢經歷喪妻之痛。以前Ming嫂成日跟住Ming Sir做嘢，自Ming嫂離開之後，Ming Sir就失去工作動力：「我覺得佢已經唔喺度，唔演戲，我覺得當係懷念佢。」
（東星娛樂）
Ming Sir曾演繹無數經典角色，演藝成就早獲肯定，不過佢嘅前半生亦有光輝嘅一頁。佢係舞蹈家出身，年輕時飄洋過海到法國學跳舞，歷盡艱苦成為首位法國舞蹈界編舞嘅華人。「我嘅生命分成2段，一段做到兩隻腳傷咗唔能夠跳舞，不過仲有把口講嘢；變咗得把口，家吓就靠把口講嘢。」
（東星娛樂）
除咗悼念亡妻，Ming Sir亦唔想用人生餘下寶貴嘅時間，去演一啲冇意思嘅角色：「好多時可能喺編劇裡面，唔會着筆喺我哋角色。」對演戲仲有團火嘅Ming Sir唔甘於「冇靈魂」咁演：「有人話我唔夠專業，導演叫你做咩就做啦，咪由得佢哋講。」唔受到尊重，一度令Ming Sir意興闌珊。曾有1、2個年青人居然當面話Ming Sir廣東話講得唔清楚，要返去配音。
劉兆銘於《倩女幽魂》中演「黑山老妖」非常經典。（網上圖片）
活到呢個年頭，Ming Sir認為最緊要為自己搵個舒適嘅空間，佢唔會勉強自己去做一啲受氣嘅工作，不過佢仍等緊遇到一部好電影。
（東星娛樂）
Ming Sir仲有佢一套特別嘅堅持：「如果啲壞人角色唔死嘅話我唔想接，我想可以肯定嗰啲形象，想做到佢哋殘缺為止，我就會覺得好開心，如果唔係我唔會接。」亦因為呢個堅持，Ming Sir曾錯失拍意大利電影嘅機會。「搵我拍嘅係外國人，知道我識少少法文同埋其他因素所以搵我演。」但Ming Sir認為呢個世界有因果循環，佢覺得角色死得唔徹底，所以就唔接，都可以話係一個「性格巨星」。
（網上圖片）
Ming Sir上年參與拍攝網劇《蝕日風暴》，令佢更唔捨得停止做戲：「雖然有啲工作人員唔識，但佢哋畀咗我有一種『阿叔返嚟探親』嘅感覺。拍完每一場戲，就有廿幾人影合照，有一種唔捨得你走嘅感覺，我係第一次感受到，搞到我有一種好Happy嘅感覺，仲令我好唔想退休，我要爭取時間繼續做。」
Ming Sir於《蝕日風暴》中飾演富商「翁振中」。（網上圖片）
「我要鍛煉好身體，先可以接嘢做，唔可以放鬆，要為出戰做好準備！呢種係生命力嘅再生，有得互相比對，一休息就冇再生嘅能量。」Ming Sir嘅生、心理都隨時Ready將最好嘅畀觀眾，或者就係佢呢個心態，先可以令佢喺各個範疇都咁有成就，咁得人尊重。
撰文：黃蘊姿