迪士尼園藝部精心打造 剪裁聖誕園藝風

聖誕臨近，唔少商場、街道布置都愈來愈有氣氛，香港迪士尼當然都唔例外啦！黛安聽公關姊妹講，原來佢哋擁有自己嘅園藝部，團隊人數仲多達100人，當中橫跨老中青三代，有超過30年經驗嘅老師傅，亦有新入行嘅90後年輕人，負責樂園同3間酒店嘅園藝設計，仲會根據每個園區嘅主題風格，選擇合適嘅植物同修剪方式、維修保養等。

黛安知道，今年聖誕佢哋都花咗唔少心血，大家先睇到咁靚又有氣氛嘅布置！

加入香港迪士尼6年半嘅園藝服務經理鄭錦聰（Keith），本身係註冊樹藝師，現時主要負責管理香港迪士尼樂園同酒店嘅樹藝隊，亦會為樂園嘅季節性或特別節慶活動，好似農曆新年、春季、復活節等進行園景規劃。佢同黛安分享，通常會配合特別節日活動，擅用「storytelling」同專業園藝設計技巧，7個主題園區都會有唔同風格！好似氣氛較夢幻、華麗可愛嘅幻想世界，植物就會被修剪成圓形，樹葉較細塊同零碎；相反，探險世界嘅設計風格就會參考自熱帶雨林，園藝部會選用較實色、樹葉較大塊嘅植物，營造出原野嘅感覺。

至於每逢季節性或特別節慶活動，Keith亦會配合安排作出相應設計，好似今年聖誕特別活動咁，花材同植物配搭上亦見心思，除咗用聖誕花、月桂等時花外，仲用咗差唔多兩個月時間，同各部門溝通、協調，選擇合適嘅植物品種同鋪排方法，最終先創造出色彩繽紛嘅園藝作品！

黛安知道，園內植物種類繁多，連大樹、花卉、植皮等，品種多達約800種，所以樹藝隊工作相當重要，迪士尼仲會提供唔少專業訓練課程，個個都係「周身刀、張張利」，如果你都志在於園藝行業發展，都可以考慮加入香港迪士尼㗎！