修哥準備紅館騷 薛家燕強勢回歸《流行經典50年》

胡楓（修哥）前晚最後一次主持《流行經典50年》，之後便要準備紅館個唱，並由薛家燕強勢回歸擔任主持。前晚家燕姐向修哥送上鮮花致謝，修哥則回贈一吻，歡迎她歸位。

胡楓前晚邀得老友曾江及Joe Junior上節目，而薛家燕與修哥一同受訪時，家燕姐表示自己半年前要舉行巡迴演出，所以誠邀修哥出任主持；明年輪到修哥舉行演唱會，所以她回歸擔任主持。她說：「我希望畀新人多啲機會，為樂壇帶嚟凝聚，我哋嘅好朋友黎小田都有呢個意願，我哋要秉承佢嘅意願，努力支持落去。」

修哥暫定於明年五月尾舉行兩場紅館騷，家燕姐大讚修哥屆時以88歲高齡再踏足紅館，可說是個紀錄，她更向修哥自薦做嘉賓：「有無需要幫手？我哋可以一齊跳十字步。」問修哥會否邀請一眾契仔契女任嘉賓，他笑說：「呢啲交畀主辦單位負責，我淨係專心做好個騷。」

譚嘉儀唔急拍拖

同樣有份任主持的歌手譚嘉儀，得悉家燕姐回歸十分驚喜：「我好期待同家燕姐呢個新嘅主持組合，我都識跳十字步，之前試過喺節目上黐住粒墨扮佢，所以大家會叫我嘉儀媽媽。」聖誕將至，單身的譚嘉儀希望在工作中度過：「我又無追求者，lonely咗好多年，自己一個人都可以好開心，聖誕就陪屋企人。」

撰文︰倪小珊

美術︰梁政敏

攝影︰林良明

編輯：李潔盈