與「藍飛」浪漫共舞 周柏豪搞喊全屋女人

周柏豪和黃浩然昨日到電視城宣傳台慶劇《多功能老婆》，並為《萬千星輝頒獎典禮2019》拉票。柏豪以劇中的鬍鬚造型現身，被「情敵」黃浩然嘲諷「你個鹹濕樣出晒嚟」，二人「互睥」兼上演一輪唇槍舌劍，場面搞笑。

周柏豪、黃浩然、袁文傑及戴祖儀等，昨日在活動上除了為劇集拉票外，還即場品嘗湯丸預祝冬至，在劇中為爭奪「藍飛」楊千嬅鬥個你死我活的柏豪與黃浩然，在台上互窒完後，又表演互餵對方食湯丸，黃浩然更表示︰「我啲湯丸加咗料㗎！」柏豪訪問時表示，前一晚播出他黐鬚與千嬅浪漫共舞，事後收到很多觀眾私訊他說很浪漫，他表示︰「好多人都話睇到喊咗出嚟，我有朋友仲話我搞喊佢全屋嘅女人。」

柏豪指除了歸功於故事紮實，剛出世的女兒亦好腳頭，他說︰「梗係希望BB繼續旺爸爸。」柏豪又開心表示《多》劇出街後，擴闊了他的粉絲層面，日前往超市購物時，不少市民和收銀姐姐都爭相和他合照。問到他湊女有何新進展？他笑指︰「最成功都係換尿片，好有滿足感，湊女無說明書，依家開始摸索到佢嘅性格。」他又透露將會盡快為女兒改名字拿出世紙，否則逾期會被罰款，柏豪笑言︰「罰幾百蚊㗎，可以買到幾包尿片。」

黃浩然不擔心被定型

而黃浩然則透露前一晚以觀眾身份支持該劇，也感到十分浪漫，笑言自己是女人也會「死」在榮浩田手上。黃浩然又透露尚劍雄會在尾段以可愛搞笑回歸，不會再這麼黑人憎，他笑言︰「大家記得要睇，如果我個角色夠賤成全到佢哋，證明佢哋都係靠我。亦都開心嘅，喺套劇裏面做到啲現實中唔敢做，亦唔會做嘅嘢！」

今次演賤男入型入格，黃浩然坦言將來不怕挑戰演奸角，更指有幾多接幾多，也不擔心被定型。對於黃心穎日前返港，跟心穎合作《法證先鋒IV》的浩然，表示沒刻意跟對方聯絡，他說︰「呢個時刻唔方便，有機會見到面會問候下佢。（支持佢回來拍劇？）作為同事和朋友，佢想做乜便去做，會祝福佢。」

撰文︰倪小珊

編輯︰黃卉彤

美術︰梁政敏