老公出錢支持 寶珮如逆市開美甲店

寶珮如（Baby）昨日以老闆娘身份，到尖沙咀出席美甲店開幕，獲好友楊玉梅、袁潔儀及林建明到場支持。Baby獲老公出錢投資美甲店，她幸福表示獲老公支持，更希望將來建立美容王國。

寶珮如今次斥資五位數字，與友人合資美甲店，她笑說︰「今次開舖好倉卒同冒險，不過我拍檔做美甲好多年，所以我先加入，大家可以一齊扮靚，我又想學整甲，希望將來幫人修甲。」楊玉梅大爆Baby獲老公出錢投資做老闆娘，又收到老公送鑽戒賀生日，Baby幸福說︰「我同老公講我老，想有自己嘅生意，佢叫我唔好三分鐘熱度，所以喺屋企掛住『堅持』兩個字。雖然香港市道麻麻，但我有信心，希望向鄭明明呢個美容王國出發，目標係上市。」

楊玉梅想影寫真

Baby感激好姊妹楊玉梅只收一封利市，便為美甲店任代言人，楊玉梅聞言講笑說︰「你仲未畀利市我呀！不過我哋講心唔講金，我為咗好朋友犧牲色相，明明無身材都露少少。」她笑言看到羅霖和溫碧霞影寫真集十分漂亮，所以想約Baby齊齊影寫真留倩影。

撰文、編輯︰李潔盈

美術︰顏玉玲

攝影︰林良明