冬至醫院探母 周潤發想轉工教行山

影帝周潤發昨日現身養和醫院，探望入院接受身體檢查的母親。休假中的發哥透露正鍛練身體迎接新工作，又笑指有意轉行做行山教練。

侍母至孝的周潤發，不時陪伴母親歎茶及逛街，早前更被拍得攙扶母親上落座駕，並熟練地替母親收起輪椅，照顧得無微不至。昨日冬至，發哥於中午時分現身跑馬地養和醫院，全身黑色打扮兼戴上口罩的他，透露現年90多歲的母親因老人病要入院做檢查，聖誕節後才能出院。發哥又透露發嫂前一天已到醫院探望，兩人輪流到醫院照顧，有否提早與母親做節？發哥說︰「頭先同佢食咗嘢，佢唔使戒口，因為依家咩都打爛晒，條喉直入，餵番糊仔就走。」

雖然母親年紀老邁，但發哥大讚母親夠精靈，他搞笑說︰「佢好精靈㗎，仲想點呀大佬，叻到不得了，仲趕我走呀！」去年尾，發哥完成電影《無雙》的宣傳工作後休假至今，問他何時復工？他說︰「無呀，我依家日日鍛練自己身體，鍛練身體可以迎接新工作。」

自嘲在娛圈式微

明年再開工？風趣幽默的發哥說︰「我想轉行做運動員，諗住考個教練牌，做行山教練，呢行（娛樂圈）都開始式微啦，我講自己咋！平時都會同啲藝人朋友行山，最新收嗰條 (口靚)係阿鮑（鮑起靜）。」發哥離開前亦不忘祝傳媒「冬至快樂」，非常親民。

撰文︰倪小珊

編輯︰李潔盈

美術︰梁政敏