2004年港姐冠軍出身嘅徐子珊，15年來於歌影視三棲發展，成績一直都唔錯。但日前佢突然宣布退出娛樂圈，要做番一個普通人。
徐子珊2004年參選港姐奪冠軍、修身美態獎、最上鏡小姐及國際親善小姐四獎。（東星娛樂）
2007年徐子珊奪《萬千星輝頒獎典禮》「飛躍進步女藝員」。（東星娛樂）
徐子珊花兩年時間，半工讀修讀心理學碩士同珠寶設計課程，半年前已順利畢業：「好鍾意讀書，之前又返學又拍劇好辛苦，好彩成功畢業。我希望繼續呢方面發展，冇諗學到邊個階段，但會係心理學研究，可以繼續讀博士、教育同臨床方面，想去外國進修，學讀到同讀唔到嘅嘢、生活上嘅智慧。」
2006年徐子珊為拍《學警出更》等犧牲一把秀髮。（東星娛樂）
（東星娛樂）
據知佢同王祖藍公司嘅合約已經屆滿，嚟緊佢心水將基地搬去荷蘭或者德國，因為呢兩個國家都有心理學可以攻讀。向來慳儉嘅徐子珊表示手上資金足夠維持日後生活水平，話打算唔再返香港，想盡快走，係送畀自己嘅40歲禮物。等自己可以有多啲時間同空間做自己想做嘅嘢。
跳舞一樣掂。（東星娛樂）
傾力參與節目《舞動全城》。（東星娛樂）
徐子珊感覺佢喺演藝生涯中未能完全「做自己」，以往每日花兩個鐘扮靚，好注重外表：「生粒暗瘡都覺得自己錯，好有壓力！」子珊話就算返轉頭，都係做幕後，唔會再做幕前。不過佢都好感激娘家無綫多年嚟畀好多機會佢：「尤其係樂小姐（樂易玲），佢真係好似媽媽，對我好好。」
徐子珊與樂易玲（東星娛樂）
過去3年簽咗經理人公司都係好似喺溫室，子珊好多嘢都唔識應付：「當然碰過好多釘，人生亦唔會冇，工作之外，我人際關係有障礙，性格亦有缺陷，要包容自己，只係過去15年醒唔到，離開香港會更好，香港環境好難，外國得到力量係唔需要從眾，好緊要，可以獨立思考做決定。依家希望向博士方向進發，研究都冇問題。」下定決心嘅佢會變賣喺香港嘅資產，徐子珊話最唔捨得係架車，至於層樓遇啱價錢就放。
（東星娛樂）
外間猜測徐子珊呢個咁突然嘅決定係打算秘密結婚，單身多年嘅佢否認，更認為一切自有上天安排，佢覺得自己似會喺外國組織家庭：「冇人睇到將來，但有憧憬開心嘅將來。」子珊入行15年，儲落唔少粉絲，佢好感激Fans為佢做咗好多嘢：「真係好多謝佢哋。記得頭兩年我帶佢哋去做義工，所以希望往後日子，即使我唔喺香港，佢哋都會繼續去做呢樣嘢。」
撰文: 黃蘊姿