《PTU》取景冰室結業 林雪食沙爹牛麵打卡

屹立旺角半世紀的中國冰室即將結業，杜琪峯當年執導的《PTU》曾在冰室取景，除了成為不少影迷的打卡熱點，連有份演出《PTU》的任達華、林雪都對這間茶餐廳充滿情意結。

林雪日前收工後特意到「中國冰室」開飯，他選擇樓上的長枱座位，有街坊即重提《PTU》劇情︰「肥沙（林雪角色），你搵番把槍未？」林雪即時入戲，並搞笑回答︰「未呀，仲搵緊。」之後他點了沙爹牛麵，又不時取起手機影相打卡。林雪憶述：「嗰時我哋拍咗成個月，通常都係夜晚九點左右先開工，阿杜（杜琪峯）好鍾意呢啲有香港特色嘅地方，我都有幾部戲喺度拍，呢度嘅牆磚、枱枱凳凳依家都搵唔到啦，仲係保留以前嘅風味。（冰室結業會否很感慨？）其實呢間茶餐廳先係明星，因為香港好多電影嘅畫面都有佢。」