愛美之心人皆有之，雖然近年嘅風氣已經有所改善，但唔少人都仍然認為瘦就等如靚。藝人上鏡好多時都會肥過真人，呢一點令唔少女藝人都要睇住磅數做人。雖然有女藝人因為減肥搞到患上厭食症；不過都有人想肥都肥唔到。藝人想喺熒幕前將自己最好一面Show畀觀眾，背後嘅付出同埋受到評頭品足嘅輿論壓力，真係有苦自己知！
韓君婷
韓君婷22歲出道時身材圓潤，更被封為「籮霸」，但出道數年後變得瘦骨嶙峋，體重僅得103磅。韓君婷曾指出係因為輿論令佢過度減肥：「之前好多人話我hip（臀部）橫，有試過食減肥丸、去水丸，甚至係影響中樞神經嘅丸，後尾自己keep得OK，但啲報道話我仍須努力，日日聽得多就變咗有日會影響你嘅心情，突然覺得自己好mind，所以就唔食嘢、唔敢食嘢，食咗都會嘔，覺得有罪惡感。」
（東星娛樂）
直到有一日佢察覺情況開始嚴重去求醫，醫生診斷佢有厭食症，體質變得好易病同發燒。幸好依家嘅佢經過治療已經回復正常，更表示「做番自己就開心」。
（東星娛樂）
鄭秀文
過去鄭秀文(Sammi) 曾為減肥「長年累月極端節食」，Sammi指自己曾經很沉迷「皮包骨」，好後悔以前將呢種瘦到皮包骨先係靚嘅瘋狂觀念帶畀女士們。戒咗澱粉質20年嘅佢近年開始重拾米飯，認為「減肥是需要吃東西的」。
（鄭秀文IG）
左邊係「瘋狂節食」嘅皮包骨Sammi，右邊係均衡飲食加健身嘅Sammi。（鄭秀文IG）
（鄭秀文IG）
不過好多Fans都仍然都覺得Sammi太瘦，尤其係演唱會前，Sammi做大量運動同嚴格控制飲食，瘦到個人好乾身，Fans都大嗌心痛。
（鄭秀文IG）
（鄭秀文IG）
近日Sammi因為拍戲而增肥咗少少，網民都大讚有肉地嘅佢更加好睇，唔知Sammi會唔會從善如流，Keep住呢個肉地身形呢？
陳凱琳
陳凱琳選港姐嘅時候只有39.5kg，當時被指係13歲嘅身形，就連佢之前佗BB，都唔見佢肥咗喺邊。大家都羡慕佢「唔識肥」，不過其實佢自己就唔多鍾意。現家已經增咗磅嘅佢曾直言經常被指太瘦會覺得唔開心，佢話佢同家人同屬「瘦底」，係基因嘅問題：「我最重都冇超過100磅，有時畀人講太瘦都會唔開心，因為我冇瘦就係靚嘅標準。」
（東星娛樂）
唔講點會睇到佢有咗？（陳凱琳IG）
其實老套講句，乜都假，肥瘦都係皮囊，健康至係最重要。
撰文: 黃蘊姿