黛安
黛安

新春利市封巡禮 金鼠閃耀 貴氣賀年

發佈時間: 2020/01/08

新春利市封巡禮 金鼠閃耀 貴氣賀年

農曆新年就快到,過年嘅重點除咗賀年美食,當然仲有派利市啦!唔少人都關注利市個「餡」,黛安就覺得一個靚靚利市封都好重要,收到嘅人都會愛不釋手㗎。

黛安知道唔少商場都會舉辦活動迎新春,仲有靚靚利市封換領!好似太古城中心喺今個星期五(10日)至下個月19日,就同Coca-Cola攜手打造「紅運豐收」主題活動,只要喺場內消費滿指定金額,同埋成功登記成為LIVE+會員或出示LIVE+會員卡,就可換領Cityplaza x Coca-Cola「迎春滿祝」利市封同豐富禮品,其中限量版嘅利市套裝綫條設計時尚簡約,寓意鴻運當頭嘅紅色封套,透出「可口可樂」經典玻璃樽身剪影,加上熨金圖紋,既典雅又矜貴。

荷里活廣場就喺今個星期六(11日)至下個月16日,邀請咗日本立體水引技術創始人津田左右吉第五代傳人-津田六佑,喺香港首次展出逾300個精緻日本傳統水引風鈴,同場更設有5米高巨型「新春開運許願風鈴」同「幸福水引風鈴桃花園」,大家可以喺風鈴聲下誠心許下新年願望,同埋行個桃花運。喺場內消費滿指定金額或以指定VIC積分,亦可換領招財金鼠閃「躍」版利市封,或「招財金鼠」閃亮版利市封一套。

至於荃灣廣場今年亦推出咗一套4款嘅「靈鼠獻瑞」利市封,The Point會員以800積分,就可換領一套,換領日期由今個星期六(11日)起至今個月24日,想換領嘅朋友要留意喇。

撰文: 黛安 消息特靈八卦公關
欄名: 八卦名利場