激咀帶病拍檔 洪永城焗住錫陳瀅鼻涕

無綫新劇《黃金有罪》前晚首播，洪永城、陳瀅、張兆輝及姚子羚等一眾演員在電視城食飯睇劇。洪永城與陳瀅在劇中有多場親熱戲，陳瀅自爆拍某場接吻戲時剛巧發燒又屙又嘔，結果難為洪永城「頂硬上」拍攝，錫嘴更錫埋女方的鼻涕，相當噁心。

一眾演員以80年代的打扮現身首播飯局，洪永城與陳瀅重提去年拍攝劇中的親吻戲時，陳瀅笑言當時正趕劇集埋尾，即使她患了腸胃炎，又屙又嘔也要上陣拍攝。她與洪永城埋位前要先食感冒藥打底，接吻時更嘗到對方口中的藥物苦味。洪永城說：「錫佢嗰陣連佢啲鼻涕口水都錫埋，都感染咗少少，惟有食藥同維他命C，因為劇集埋緊尾，無論幾嚴重都要咀陳瀅。」

提到洪永城近期拍劇都艷福無邊，問女友梁諾妍看到會否「火遮眼」？他說：「唔會，如果咁都火遮眼，真係要檢討下大家嘅關係。」他指與女友算比較開放，不會介懷對方拍親熱戲。

張兆輝炒股輸首期

同場的張兆輝與姚子羚席上合唱《月亮代表我的心》，劇中張兆輝飾演股壇狙擊手，他笑言現實中完全相反：「如果早幾廿年拍呢套劇就好，買股票千祈唔好做盲頭烏蠅，人哋畀乜貼士都買。（戰績如何？）唔好提，係血汗錢，輸咗六位數，當年夠畀做首期，但經一事長一智。」姚子羚則聽媽咪話買「磚頭」投資，早前成為業主的她，現在努力賺錢供樓。

採訪︰Pauline

編輯︰李潔盈

美術︰梁政敏