現年41歲嘅Danielle原名Danielle Peita Graham，出生於馬來西亞吉隆坡，父親係愛爾蘭人，母親則係馬來西亞華人，佢自細就跟隨父母由馬來西亞移居到澳洲生活。
（東星娛樂）
Danielle喺澳洲開始佢嘅兼職model生涯，十六歲開始轉為全職。98年開始來港發展，憑佢天使面孔同雪白嘅肌膚，吸引護膚品牌廣告垂青一炮而紅。混血模特兒當時喺香港非常吃香，2001年佢同前輩琦琦、馬詩慧，同時獲選為「十大模特兒」，後來進軍影圈，風頭一時無兩。
（電影《異靈靈異》截圖）
Danielle後來返回老家馬來西亞發展，2009年於吉隆坡嫁予當地銀行界才俊Patrick Khoo，當日着嘅Vintage婚紗價值港幣一百萬元；豪花三百萬於當地五星級酒店Hilton設宴款待賓客外，更以一百萬包起近六十名親友嘅機票、酒店同食宿，估計婚禮花費近五百萬港元。
（東星娛樂）
二人好快就誕下一子一女，可惜2016年離婚收場，Danielle以單親媽媽身份照顧現年分別8歲的女兒Sophia同10歲的兒子Benjamin。Danielle堅持每日接送返學放學，放學之後又有課外活動。佢自言係「怪獸家長」，兩個小朋友每星期都學一次中文、游水同彈琴，而Sophia就有學唱歌、芭蕾舞，Benjamin就有學打鼓，行程排到密密麻麻！
（Danielle IG）
不過佢就話自己每日都學習緊：「我想鼓勵佢哋從唔同嘅機會學習，有藝術、音樂、運動、語言，睇吓佢哋鍾意或者邊方面叻，但因為佢哋仲係小朋友都會畀時間去玩，特別喺周末我哋亦會一齊參與親子活動，可能係喺廚房煮嘢食。」
（Danielle IG）
Danielle雖然失婚，但都活得非常精彩，除咗將兩個小朋友照顧得非常妥貼之外，仲建立起自己嘅廚具事業。Danielle話由佢細細個開始已經想出烹飪書，而2017年佢都完成咗呢個夢想。有愛爾蘭同華人血統嘅佢從小就向父母學習烹飪，對中西美食甚有研究。佢覺得表達愛嘅最佳方法係同至親摯友分享食物，尤其係佢做咗媽媽之後，煮一餐飯畀佢嘅家人食成為咗佢生活中最重要嘅一環。
（Danielle IG）
Danielle創立廚具品牌嘅初心係想將既摩登又耐用嘅廚具帶入廚房，亦令佢嘅客人煮食時更加方便易上手，可以享受煮食嘅時光。
（Danielle IG）
撰文: 黃蘊姿