每年新春之前總會見到麥玲玲師傅講解來年生肖運程，她總是以紅卜卜造型示人，加上燦爛的笑容，就算流年運程一般、犯太歲，在她的口中說出來，總是化成無比的正能量。當上玄學家已經有23年的時間，原來她起初愛上玄學是因為媽媽，玲玲姐說：「媽媽在生時都會搵風水師傅睇風水，印象中佢被批到某年紀會有一個關口，過到就有幾多歲，過唔到就只能夠幾多歲，後來發現真係講中咗，我媽媽真係某一年過身，我就諗命運到底係咪喺特定框架入面呢？可唔可以超越佢？於是我就跟老師去學玄學。」
相關新聞：【婚禮星光熠熠】C君暗戀到追求老婆足足10幾年 結婚全因為子華神？
(圖片：《晴報》圖片)
(圖片：《晴報》圖片)
麥玲玲出道之時，香港並沒有很多女性玄學家，能夠成功「跑出」原因有三，她說：「市面上好多師傅技術好好，大家講到同一樣嘢，但表達方法唔同，充分同清晰表達畀客人，呢方面我比較有優勢。」此外，當時媒體無論社會、娛樂、民生大小事情都要問玄學家，很快將麥玲玲的名字推上位，她表示：「十多年前推出運程書的時候，出版社覺得女玄學家嘅書可能無人問津，但事實證明唔係，市場上需要女玄學家，因為算命的客人以女性居多，我理解女性的思考模式，比較容易溝通。」
(圖片：《晴報》圖片)
(圖片：《晴報》圖片)
當客人面對人生逆境，麥玲玲表示玄學家不能夠改變事實，只是希望大家換個角度思考，她說：「我預計聽日會落雨，但我唔可以阻個天，我只能提大家帶雨具。算命都係同一道理，提醒客人去預備，唔係要呃人，而係用方式令人心態上作出調整，唔好下下將目標定得太高，人人想今年賺5,000萬，但原來流年唔好，我同佢講唔蝕就偷笑，客人知道之後，發現唔蝕之餘仲賺到200萬，咁樣就會開心好多。」
麥玲玲直言玄學家是吃力不討好的工作，就算知婚姻會離婚，都很難直接告知，她說：「太殘忍啦，唔同人哋拍住拖嚟，我話你就分手咩？我只會提大家唔好信晒對方，要識得自保。就算我算到明星會離婚，我都只會提醒佢要管好自己錢財，唔會講離婚，不過離婚唔係咩壞事，話唔定下次再婚嫁得更好呢！人最重要係身體健康，有健康就咩都搞得掂。」
(圖片：《晴報》圖片)
(圖片：東星娛樂)
正所謂一命二運三風水，麥玲玲巧妙比喻命運，她說：「命係一個玻璃杯，運係入面嘅水，有啲人隻杯好大，你做到李嘉誠個仔咪啤酒杯囉，差極都有十個傭人、廿架車，有啲人隻杯細啲，功夫杯咁，就算水滿了，都係得兩層樓加一個傭人一架車，所以根本沒可能比較，比較理應係自己同自己比較。人生係自己嘅，鍾意做就去做，唔好理其他人眼光。」
(圖片：《晴報》圖片)
(圖片：東星娛樂)
麥玲玲跟丈夫結婚25年，新年前的玲玲姐忙過不停，經常在香港亮相運程節目之餘，更頻頻往返內地，問到會否冷落丈夫？她說：「女仔先會成日想人陪，男人有好多嗜好，又車又音響，有時我返到屋企，佢反而問我做咩咁快返。我老公EQ好高，做事慢條斯理，我就比較急，一凹一凸相處不錯。」
麥玲玲稱忙歸忙，自己會安排好老公和老公夫家的事，大時大節安排好食飯、辦年貨等等，她說：「家庭上大小事我都處理好，當然唔係咩都滿分，你要我溫柔就梗係唔得啦，你想我好似白兔咁我冇計，不過如果佢鍾意強悍嘅另一半，我當然係100分啦！」
(網上圖片)
(圖片：東星娛樂)
(圖片：東星娛樂)
撰文：楊安莉