《三五成群》中暴戾嘅「廿八座大王」或者大家都好熟悉；惟現實生活中嘅佢，大家可能會覺得非常陌生。「大王」本名為宋本中，名字嘅意思係「本來係中國人」，係佢爺爺為佢改嘅。
（網上圖片）
宋本中媽媽係法國人，爸爸就係香港人，佢喺法國出世、香港長大，1歲之後就冇再見過佢媽媽。後來因為被特約演員公司老闆媚姨領養，宋本中早年已展開佢嘅電影生涯，做過無數次臨記，直到遇上《三五成群》中「廿八座大王」一角，成為經典。成也蕭何，敗也蕭何，角色雖然經典，但《三五成群》反令佢被定型，愈做愈灰，最後索性轉戰幕後。
（網上圖片）
宋本中10幾歲拍戲時，養母問佢要唔要改個藝名？一個好厲害嘅易經師傅幫佢嘅名字起咗個卦，得出「終身不遇伯樂」，易經裡面嘅圖有一棵樹，然後有一條繩子將馬綁住了，旁邊有一個老人。宋本中話佢一睇到張圖已經嚇倒，因為佢正係屬馬。不過最後佢都冇改名，因為名字始終係佢過咗身嘅爺爺幫佢改。
（網上圖片）
事實上宋本中喺佢嘅演藝生涯都有好多貴人，陳惠敏喺佢11歲時領養佢，黃秋生領養過佢，李兆基亦係佢契爺。佢哋喺電影圈都好有地位，但就係冇幫到佢。宋本中最後終於參透，佢命中唔需要「求人」，佢本身就係千里馬，唔使人哋去「騎」都可以奔馳。
（網上圖片）
宋本中曾喺《和平飯店》同周潤發做對手戲，宋本中曾請教周潤發點先可以有更好機會，周潤發同宋本中講咗2個字，就係「堅持」，話做任何事都一定要堅持，亦係呢番說話令宋本中堅持到今日，一生受用。
周潤發（東星娛樂）
宋本中索性轉行幫爸爸打理茶餐廳生意，後來喺爸爸鼓勵下，開始拍獨立短片，展開佢嘅幕後生涯。2006年，宋本中同好兄弟陳國坤喺某工廈租咗一個單位，成立了製作公司，試過無飯開、試過唔識睇合約被人呃。
（IG圖片）
2009年北上發展但唔太理想，直到陳國坤結婚時，宋本中喺席上認識了應采兒，對方問佢有沒有興趣為《天才在左瘋子在右》執導，先開始打開市場。差唔多時間陳國坤靠《李小龍傳奇》打開了國內市場，不過陳國坤日日同啲唔識打（唔識就力）嘅人打，隻手腫到不得了，兄弟二人SKYPE時喊到收唔到聲，共過患難，感情仲好過同另一半。
（IG圖片）
撰文：黃蘊姿