黛安
黛安

睇4.4米賀年全盒 行8米花海隧道 許願祈福賀新春

發佈時間: 2020/01/14

睇4.4米賀年全盒 行8米花海隧道 許願祈福賀新春

新一年要過得好,新歲當然要玩得盡興。黛安就精選咗3大商場打卡靚位,保證新春一家大細「行街行得開心、打卡打得過癮」。首先係銅鑼灣必去熱點皇室堡,今年首度邀請兩隻人氣企鵝Pete and Gulu由南極嚟香港做吉祥物,仲入鄉隨俗換上「福鼠」打扮同大家見面。

到時Pete and Gulu除咗會喺高4.4米嘅「巨型新春賀年全盒」同大家拜年,仲準備咗「巨型芝麻湯圓」畀大家打個靚卡。最特別嘅莫過於位於中庭嘅「魚躍龍門水上飄」裝置,小朋友可以隨時走上魚池上面許願,新一年實會旺到飛起啦!

時代廣場喺新春亦都「心花放」,商場特登布置咗8米長嘅花海隧道,掛滿浪漫吊燈,夜晚仲有花海投影,啱晒女士影新春profile pic。商場2樓仲有花氣AR拍照館,影相時有齊Atelier Cologne同BYREDO Blanche兩大香水品牌嘅香氣點綴。同場仲設有互動體感求籤筒,等大家即時知道來年運程,仲有機會贏到時代廣場商戶嘅優惠禮券。

另外,將軍澳中心今年為迎來福鼠,特別打造咗鳥居神社,仲有「有福の泉」同「有米拉麵」兩大遊戲站,The Point會員大玩送現金券遊戲,玩完仲可以去「富士山澡堂」用金幣洗白白,預祝新年賺到盆滿缽滿。

撰文: 黛安 消息特靈八卦公關
欄名: 八卦名利場