陳慧儀1989年參加香港小姐競選，但與獎項無緣。落選後陳慧儀參與演出多部電影，並於拍攝電影《小男人週記》時認識電影導演陳嘉上，其後息影並與陳嘉上結婚，婚後育有兩名子女。
（網上圖片）
（陳慧儀Facebook）
（東星娛樂）
不過兩人嘅婚姻只係維持三年咗就結束，一對仔女跟隨母親陳慧儀生活。前夫陳嘉上早前同細30年嘅女友再婚，近日仲生咗個女，相反樂得做女強人嘅陳慧儀佢就冇再婚嘅打算。而佢同陳嘉上因為一對仔女嘅關係，仍然保持聯絡。
（陳嘉上微博）
陳慧儀離婚後恢復幕前演出，仲轉型成財經評論員，考取證券經紀牌，於商業電台及無綫電視主持多個電台及電視財經節目。不過鍾意學新嘢嘅佢一次接觸到韓式唧花就非常投入，更加專程飛3次韓國去學呢門手藝。後來轉移至學「啫喱花」，啫喱花盛行於亞洲地區，如越南、印尼等地。陳慧儀為咗學啫喱花又周圍飛去拜師學藝，新加坡、越南、馬來西亞、韓國、印尼……大大話話有十幾個師傅，甚至有時早機去，晚機返咁去學嘢。
（陳慧儀Facebook）
（陳慧儀Facebook）
陳慧儀直言搵錢係少咗好多，但佢就一啲都唔介意：「我鍾意接受挑戰，從頭嚟過都無所謂。相比以前做財經所搵嘅錢，依家其實差好遠。有世叔伯問過我係咪真係放得低，我話我可以。」
由2016年底開始，收費再加慈善義教，陳慧儀嘅學生都有超過3,000人。最初陳慧儀教啫喱花嘅時候，工具都唔容易搵，就算有工具，一套10件，只是用兩、三件，其他都唔知點用。後來佢索性自己設計埋工具，並且變成一個品牌出售。
（陳慧儀Facebook）
上年陳慧儀更加接手朋友嘅食品工場做老闆。不過一向由男人話事嘅廚房，陳慧儀就遇到阻滯，佢形容一個女人仔又多意見，廚師當然都不習慣，不過全憑佢EQ高，問題都迎刃而解。
（陳慧儀Facebook）
陳慧儀並非飲食界出身，有好有唔好，有幾十年經驗嘅廚師追求層次技巧；而佢就諗到一啲市場上冇嘅嘢，夠天馬行空。「女人仔」嘅身份都有好處，就係「我知女人心」，女人食甜品只要靚，整到十八層但外形唔靚都冇用，佢理解到好多女人幾十蚊買件cake，為嘅就係影相打卡，呢啲都係廚房一班雄糾糾嘅男人唔會諗得到嘅地方。
撰文：黃蘊姿