近年梁靖琪、黃澤鋒同林子善都先後成為新手媽媽、爸爸，又好似不約而同地，佢哋3位喺生BB嘅過程中同樣遇到驚險，好彩大步跨過，成功誕下超得意嘅囝囝、囡囡。為咗記錄BB嘅成長片段，呢班父母仲幫佢哋開Instagram帳戶，化身小網紅，張張相都有幾百個like！
梁靖琪
上年6月，36歲嘅梁靖琪再婚，下嫁比自己年輕8年嘅圈外人施雋賢，直至年尾佢要生嗱，但生產過程長達16小時，最後先決定緊急開刀剖腹，誕下8.6磅嘅囝囝Roman施睿文！不足1個月，Roman已經大個咗唔少，佢嘅個人instagram帳戶已經有成千個粉絲！
(梁靖琪instagram截圖)
(Roman instagram截圖)
(Roman instagram截圖)
前幾日佘詩曼特登去探Roman，個樣充滿母愛，雖然佢冇化妝嘅情況下皮膚勁靚，不過始終唔夠表情多多嘅Roman搶鏡。最後佘詩曼忍唔住話：「沒當過媽媽就是沒當過媽媽。哄小孩，太不容易了！ 懷着不放棄的精神，千方百計，終於博得俊男微微一笑。」仲搞笑話梁靖琪個仔好寸！
(佘詩曼instagram截圖)
(佘詩曼instagram截圖)
林子善
上年年尾，林子善榮升為人父，老婆董佩欣誕下近6.3磅嘅囡囡「小乖乖」林以晴。但小乖乖未出世前，林太試過患感冒唔夠膽食藥，免疫力下降，結果生蛇（帶狀疱疹）；仲試過幾次流啡（作小產），去急症睇醫生後好番。林子善讚林太好勁，生產過程唔打麻醉針，生完傷口痛、胸部脹痛都依然以正能量面對，相反佢身為爸爸哭成淚人。
(林子善facebook page截圖)
自從小乖乖出世，林子善就親力親為餵夜奶、換尿片、沖涼、氹小乖乖瞓覺等。不過冇幾耐前，小乖乖突然血染床單，搞到兩公婆勁驚，之後發現原來佢唔小心咬損媽媽乳頭，將血吞埋落肚再嘔出嚟。點知第二日，小乖乖黃疸指數再次升高，又要再入院照燈，兩公婆擔心到喊晒口。好彩依家小乖乖冇事，仲同爸爸林子善成個餅印咁。
(林子善facebook page截圖)
(小乖乖instagram截圖)
(小乖乖instagram截圖)
黃澤鋒
上年7月，黃澤鋒老婆陳麗麗以52歲高齡誕下囡囡「小黃妃」黃熙恩，過程非常艱辛，先係懷孕初期飽受濕疹折磨，期間受到不少網民嘅毒舌咒罵，身心受創；後來陳麗麗生產過程突然血壓急升患妊娠毒血症，昏迷咗2個小時，需要即刻全身麻醉開刀拎BB出嚟，否則有中風危機，產後仲要送入深切治療部觀察，好彩有驚無險。
(黃澤鋒facebook page截圖)
依家小黃妃擁有個人facebook page，見到佢隻眼超級大，好可愛，令人個心都融埋，唔怪得有傳黃澤鋒同陳麗麗好想生多個！
(小黃妃facebook page截圖)
(小黃妃facebook page截圖)
(小黃妃facebook page截圖)
撰文：張芷晴