現年88歲人稱冬叔嘅夏春秋，係《六合彩》嘅第一代主持人，曾主持《六合彩》攪珠直播17年，故有「六合彩之父」嘅稱號。風趣幽默嘅冬叔話一聽到有人哼唱《六合彩》嘅開場音樂就想屙尿。
（網上圖片）
機緣際遇成就冬叔
想當初冬叔因喜歡說話、演戲而投考演員，不過就因為生得唔高，公司話佢冇機會做主角了，只有做二三線。後來因冬叔說得一口流利英語，能現場以中英文報道《六合彩》，故成為膾炙人口的《六合彩》主持。冬叔唔係用報道形式去做，較生活化又生鬼，觀眾非常受落。曾為家計會拍攝嘅廣告中，報出攪珠號碼為「仔女女仔仔女，特別號碼是雙胞胎」，令人留下深刻印象。冬叔更指因主持《六合彩》經常爆騷，最高紀錄試過接十三個廣告。
（東星娛樂）
雖然冬叔差唔多期期都買六合彩，但佢坦言只係中過安慰獎。冬叔仲憶述六合彩嘅攪珠過程非常嚴謹，唔可以畀整個拍攝團隊進入攪珠場地；入廠錄影前要熄電話，以免影響儀器運作，更會有專人把守同裝有號碼球嘅箱扣埋一齊，又要量度每個球嘅重量，若有些微差距，就要替換。
（東星娛樂）
預知號碼
《六合彩》都是直播，冬叔坦言壓力好大：「我以前放假試過有女藝員替我，佢做完一次，以後都不敢做。」冬叔都試過發生過一啲「蝦碌」嘢，誤將18號球報做10號，但咁啱得咁橋下一個攪出嘅號碼就係10號:「人人都話係造假，話冬叔預先知道下一個號碼，我真係百辭莫辯。」不過冬叔話依家開彩氣氛唔同咗，比較呆板些，似例行公事。佢又感嘆現在物價貴，中六合彩唔再好似從前咁令人驚喜。
（東星娛樂）
冬叔好多謝主持六合彩為佢帶嚟嘅一切：「今時今日，我都好慶幸不少人見到我都會提起六合彩。六合彩帶畀我名望，亦帶畀我歡樂。我呢個人好易滿足，有今日嘅成就，令人開心，我就足夠了。」
（東星娛樂）
人生最大成就
不過講到成就，成為膾炙人口的《六合彩》主持都未係最令冬叔自豪。冬叔有感人生嘅最大成就係生咗阿女吳君如，佢話君如喺自己眼中又醜、屁股又大，但當初卻是他幫助君如打開演藝之門：「我幫佢報名麗的訓練班，點知冇回音，於是帶佢去見劉芳剛，咁就收咗佢，之後我都冇再幫佢，任由佢自己發揮。」冬叔話君如遺傳咗佢表演因子：「佢由細到大都好孝順，依家佢有能力，又會主動供養我哋。我覺得自己最大成就唔喺娛樂圈，而係生咗君如。」
（君如Facebook）
君如同阿媽其實好似樣！（吳君祥微博）
（吳君祥微博）
冬叔仲係一個用情專一嘅好男人，今年佢同太太已經結婚56年，正邁向鑽石婚。阿仔吳君祥仲大爆冬叔係佢媽媽嘅初戀情人，係佢第一個亦係唯一一個男人。冬叔到依家都不時被傳媒影到同老婆拖住手出街，仲會一齊出席好多公開場合，非常恩愛！
慶祝結婚紀念日，So Sweet！（吳君祥微博）
撰文：黃蘊姿