話咁快又到農曆新年,過年除咗食糕點、拜年,最開心當然係一大班人坐定定,收睇返舊時經典賀歲電影。「賀歲檔」係香港港電影傳統重要檔期,因為香港人都鍾意趁放假,齊齊去戲院感受下歡樂氣氛。以往經典嘅賀歲電影,其實好多都係80、90年代嘅港產片,個段時間係香港電影嘅光輝歲月,一齊回顧返幾套經典賀歲電影啦!
(《嚦咕嚦咕新年財》劇照)
《嚦咕嚦咕新年財》
呢套真係千禧年後的最佳賀歲片,唔單止結集劉德華、劉青雲、古天樂、梁詠琪等多位巨星,電影入面好多對白都超經典,夠深入民心,例如「牌品好,人品自然好;牌品唔好,即係人品唔好」、「愈爛嘅牌,愈要畀心機打」、「我要同我奶奶報仇!」真係過年打牌必備電影呀!
(劇照)
(劇照)
《家有囍事》
數經典賀歲片點可以無周星馳!星爺套《家有囍事》卡士超勁,結集咗哥哥張國榮、黃百鳴、張曼玉及吳君如等巨星,絕對係一個時代嘅經典!《家有囍事》夠無厘頭,經典場面多不勝數,例如星爺個爆笑病名「無定向喪心病狂間歇性全身機能失調症」,都已經夠記憶深刻。
(網上圖片)
吳君如個look好好笑(網上圖片)
《富貴逼人》
賀歲片好多人都覺係搞笑為主,不過舊時都有好多係諷刺時弊,好有深度,就好似1987年出品的《富貴逼人》,描寫80年代升斗市民生活,驃叔同肥姐飾演嘅香港典型夫妻引起唔少香港人嘅共鳴,佢哋住公屋,終日發夢會有橫財,故事笑中有淚,都難怪當年呢套電影票房大收,之後出埋《富貴再逼人》同《富貴再三逼人》。
(網上圖片)
當年小童星「招弟」關佩琳好受觀眾喜愛(網上圖片)
《八星報喜》
《八星報喜》結集咗周潤發、黃百鳴、張學友、鍾楚紅、鄭裕玲、袁潔瑩等大明星,因此非常受歡迎,並成為咗年度票房冠軍。最令觀眾印象深刻係杜琪峰惡搞《英雄本色》,係《八星報喜》重現「鈔票點煙」呢幕經典片段。
(網上圖片)
《行運一條龍》
雖然大家公認《行運一條龍》係星爺作品,但其實佢係戲入面得約十分鐘的演出。不過單靠年初四咁嘅樣:「年初四,假又放完、錢又使晒、工又要返,點會好樣」,都足夠觀眾封佢做經典賀歲電影啦。
(網上圖片)
《行運超人》
《行運超人》係少有以風水為題材嘅時裝電影,當中鄭中基搞笑演出,加埋梁朝偉憂鬱的眼神,真係好吸引!電影個句對白「在我最倒霉的那天,會有個年輕武士,帶著孫悟空和豬八戒, 腳踏七色彩雲來救我」,到而家都令人記憶深刻!
(劇照)
鄭中基係劇中扮女人(網上圖片)
撰文:羅慧怡