「我係被邊緣化到冇辦法得到支援。」視障詩人盧勁馳被無名怪病纏繞20年，多年來穿梭於各醫院的眼科、耳鼻喉科、內科、神經科等，但病因依然成迷，「廿年來畀政府人球咁喺醫療制度中拋來拋去……」由於一直無法確診，令其復康之路蒙上一層又一層的陰霾。
視力聽力有異 手指如刀割
勁馳16歲時確診患上黃斑點視網膜退化，原因不明。視力退化，更令他慢慢怕光，「我視力好差，但唔係全黑，不過望到少少光會令我頭痛、反胃、想嘔，然後啲肌肉好痛，神經反應好異常。」當決心學使用盲人工具、用電腦「聽書」取代「睇書」，可惜又遇上另一障礙，
「19歲突然聽嘢好痛，唔止聽聲好似好大聲，行出街大風吹到內耳痛，好似發炎咁痛，但睇醫生係冇發炎徵狀。啲電腦軟件讀文字出來聽，我聽耐少少會好辛苦，好似抽筋咁。」
勁馳的手指十分敏感，直言感覺有如被刀𠝹。(《護．聯網》授權轉載)
他指出，頭及頸特別易抽筋；因為怪病，現時他使用智能手機時都會以手寫筆代替雙手，
「學凸字去摸，後來發覺連手指都好敏感，好似有把刀喺手指到𠝹。用手機用得耐，手指頭會痛，然後傳到去心口。」
醫生稱無病 勸開心過活
不論哪個醫生、做多少檢查，仍查不出他感官過敏、肌肉繃緊及抽筋的病因，「所有醫生根本唔覺得我有病，然後全部勸你唔好當自己有病，開開心心生活啦。」專科醫生無從入手，惟有「close file」，輾轉間只剩下精神科醫生跟進，但病情無改善，反因服藥而得副作用，他直言認為是「誤診」。
「冇醫生診斷到我係乜嘢病，好徬徨好無助。」身處難關，卻令勁馳決心「自救」；他嘗試從跌打及脊醫等療法入手，發現有脊骨移位問題，需持續做骨架調整，在骨塊中找方法慢慢復正。他之前獲某慈善基金捐款，到澳洲治療半年，花費約10多萬，效果不俗，
「要醫到好好狀態要幾年，但我冇能力留喺嗰度幾年。」
勁馳病因目前仍然未明。(《護．聯網》授權轉載)
醫療費昂貴 夠買幾層樓
「我醫咗20年，成個家族經濟脈絡全畀我拖累晒……」勁馳坦言，過去花在求醫、檢查及治療等的費用龐大，
「我估夠買幾層樓，屋企嘅資產都轉賣晒。父母退休前支持我咁多年，而家都冇喇。」
當年，甚至要向親戚借錢，才足夠應付。勁馳不想長期依靠親友，故忍痛完成學業，「讀書過程係不斷克服每一種退化，睇唔到，會用輔助儀器；儀器用唔到，就靠聽；聽都辛苦，就學凸字，每日摸凸字摸得好痛好辛苦，一步一步捱過。」
「捱」過5次會考、再讀副學士，直到26歲才考入港大，並修畢比較文學碩士課程，投身社會已經32歲。兩年後，他轉做文職，當時收入約1萬元，
「就算唔係好有發揮，我都覺得OK，用自己雙手賺到生活費，我覺得好自豪。」
勁馳雖然「行得走得」，但其實是有苦自己知。(《護．聯網》授權轉載)
無限期停工 靠綜援維生
無奈神經常受到刺激，令他痛楚，情緒更大受困擾，精神狀態支持不到長期的文書工作，3年後惟有「停工」。刻下的勁馳「行得走得」，每日的「例行公事」是2至3小時的拉筋及伸展運動，旁人眼中看似正常，但實情是有苦自己知，每個月要進行脊醫治療減輕痛楚，又要買營養補充品。
這些另類療法的基本開支，每月就要7,000元，
「而家完全做唔到嘢，拎綜援每個月4,000蚊左右，仲差3,000蚊。如果我係罕見病、遺傳病，我可以搞個病人組織搵支援、同路人，但醫生未能判診，就算（申領）傷殘津貼都要醫生簽，我係被邊緣化到冇辦法得到支援……人生可以點？」
求醫無門 藉文學作品抒發
踏入千禧年，勁馳憑着對文學的熱愛，不但嘗試寫作投稿，後來更積極參與文學雜誌的編撰工作；「但呢幾年精神狀態唔係咁好，少咗參與」。一扇門看似關上，所幸另一扇窗已悄悄地打開。2013至16年間，勁馳協助慈善機構出版殘疾人士經歷的結集，親身採訪及寫稿，
「因為自己好有興趣，隨住身體經歷越來越多，好想了解不同殘疾人士嘅親身經歷。因為我覺得文學創作世界入面，殘疾人士嘅聲音仍然缺乏。」
雖然稿費微薄，但他認為能為同路人發聲，也是一種貢獻。前年，他更出版屬於自己的散文及藝術評論結集，名為《在熾烈的日光下我所誤讀的一切》，
「想將自己面對罕有病、一啲求醫無門嘅經驗裏面，表達一啲經驗。」
文章及影片獲《護．聯網》授權轉載，標題由《晴報》編輯所擬。
編輯：李凱晴