《愛回家之開心速遞》入面有不少對熒幕情侶，當中不少男演員都能夠表現出暖男的一面，令一大班觀眾都心心眼，一邊睇一邊冧豬。無綫Facebook 網頁See See TVB昨日上傳一個短片，短片選出《愛回家》最佳男友的首五位人選，結果出爐後不少網友都留言表示有所驚喜。即管睇睇頭五位的角色，大家又有何意見呢？
相關新聞：《愛回家》龔燁飲醉背熊若水出軌全裸成焦點？ 回帶《天與地》排骨仔變大隻男
第五位：龔燁（張景淳飾）
龔燁高大又靚仔，面對港女熊若水（呂慧儀飾）都千依百順，更識得將原本嬲到發火嘅女友氹返開心，曾揚言：「我最多食蕉連皮食足十隻！」其實龔燁對若水的愛由兩人未開始拍拖就已經非常著跡，處處在公事上維護對方，默默地為若水付出，暖男行動令他大吸粉絲，最終成功促成「龔水戀」。龔燁和熊若水拍拖之後，更融入熊家，對熊家上下都非常之好，絕對是體貼的好男友。
（圖片：張景淳IG）
第四位：曹總 (劉一飛飾)
曹總何只是最佳男友，他絕對是癡心情長劍，雖然現時仍是單身寡佬，先後跟Anita（梁茵飾）和Helen（姚瑩瑩飾）在感情上泛起漣漪，不過他對熊若水的愛是念念不忘，IG仍然只是追蹤熊若水一人。呢種癡情男，真係百年難得一見，加上曹總嘅身家超級無敵豐厚，相信係唔少人心目中嘅筍盤男友。
（圖片：劉一飛IG）
（圖片：劉一飛IG）
（圖片：劉一飛IG）
第三位：金城安（周嘉洛飾）
金城安一直以來跟大學同學女友Bonnie（林凱恩飾）感情穩定，雖然之前暗戀過香港島大學校花Venus（鄺潔楹飾），不過拍拖之後一直心繫Bonnie，就算女友父母譚道德同譚何容儀嚴厲又苛刻，但金城安為Bonnie都甘願低聲下氣，又努力去氹譚生、譚太的歡心，難怪雖然是「廢青界巨子」，但仍然有飛來蜢，池美麗（鍾凱琪飾）對安仔一直都死心塌地。
（圖片：周嘉洛IG）
（圖片：周嘉洛IG）
（圖片：林凱恩 IG）
第二位：池子孝（阮政峰飾）
池子孝同Venus拍拖之後，一直都女尊男卑，池子孝做大龍生（羅樂林飾）的私人保鑣月入過十萬，不過由於Venus是超級拜金港女，池子孝幾乎將自己所有收入去奉獻晒畀Venus的名牌包包同首飾上面。其實池子孝一向愛得死心塌地，早前跟熊心如（蘇韻姿飾）分手時，他都一樣死去活來。
(圖片：阮政峰IG）
(圖片：阮政峰IG）
第一位：池子孝（阮政峰飾）
冇錯！文冇打錯，你都冇睇錯，第一位同第二位同樣都係池子孝，點解呢？原來第二位係池子孝對Venus嘅愛，而第一位係似是而非嘅男男之愛，George！池子孝之前一直扮同George相愛，方便埋熊心如身箍煲，結果愈玩愈大，連池父（王俊棠飾）都誤以為係真。雖然子孝已經同Venus拍拖，但George仍然處處維護住子孝，擔心子孝被Venus騙財，設法將Venus的真面目試出來，呢份默默而又唔可以明目張膽嘅愛意，實在好偉大！所以池子孝對George都好好呀，仲超越晒兄弟之情添！
(圖片：阮政峰IG）
(圖片：阮政峰IG）
相關新聞：《愛回家》揀池子孝棄佐治？ 同鄺潔楹演對手戲一定要拉筋
短片推出後，網友都有不同意見，有人留言說：「我都想有咁正嘅男友」、「點解潮生無份？」、「潮生！成熟、型棍、有錢、專一」等等，似乎不少人都認為潮偉（袁文傑飾）是當中的漏網之魚，的確，潮偉面對惡死的熊尚善（滕麗名飾）都可以處處維護，又經常配合她演變態的戲碼對付金城安，認真唔話得，加上潮偉是電影公司老闆，身家不錯，絕對是筍盤男。另一位漏網之魚，當然是送水輝（許家傑飾），送水輝同大小姐（林淑敏飾）經歷多次風風雨雨，一度為了增加收入而甘願犧牲肉體，又捱更抵夜返幾份工，就是為了可以同大小姐可以有穩定的生活，好好拍拖，實在太暖男喇！
(圖片：袁文傑IG）
(圖片：許家傑IG）
撰文：楊安莉