青年義工募集口罩助獨居老友記

「愛在疫症蔓延時」﹗近日黛安對呢句說話，感受好深。市面嘅口罩供應仍然緊張，售價亦唔平，好多唔識上網買口罩嘅獨居長者尤感無助。義務工作發展局「4C青年義工領袖計劃」一班年輕義工，即使最近停課，但佢哋仍然繼續行善工作，仲發起口罩募集行動幫助獨居長者，真係好有心。

黛安知道，呢個口罩募集活動已經進行中，募集至今個星期五（28日），有心人可以喺募集日期內，親身或郵遞口罩至義工局香港義工學院（新界荔景祖堯邨祖堯商場1樓），由義工轉贈畀200位住喺祖堯邨嘅60歲或以上獨居長者；募集口罩嘅要求係原盒或獨立包裝（最少BFE 95%或以上），衷心希望大家多多支持，喺艱難時候發揮互助精神。