新冠肺炎(武漢肺炎)疫情持續蔓延全球，香港唔少公司為咗「避炎」都「愛的迫放」員工。唔使返工又唔出得街，令到大家多咗好多時間喺屋企，呢個時候最啱就係煲劇！其實香港以前電視撈飯嘅年代都出產好多高質劇集，有網民就List咗幾套佢哋想翻睇嘅經典劇集，唔知以下有冇邊套係啱你心水呢？
1.《無頭東宮》
《無頭東宮》係講張兆輝飾演嘅皇帝係「外貌協會會長」，睇中咗凌雲（向海嵐飾）嘅美貌，但佢就畀好姊妹楚楚（陳妙瑛飾）換咗塊面。故事一直發展都係睇到觀眾咬牙切齒，好有戲味！
如眼睛可分對或錯～（網上圖片）
2.《十萬噸情緣》
《十萬噸情緣》係罕有用郵輪做題材嘅劇集，男主角張家輝同女主角張可頤由故事嘅一開始已經一見鍾情仲私定終身，但就好老土咁誤會咗對方而互相憎恨。當年去到好多唔同地方取境，真係睇景睇郵輪都夠目不暇給！劇集主題曲仲係由張家輝唱，正！
會掛念就承認太掛念～（網上圖片）
3.《金裝四大才子》
呢套演集齊咗張家輝、林家棟、歐陽震華同魏駿傑幾個當時得令嘅小生，飾演唐伯虎嘅張家輝仲同飾演秋香嘅關詠荷喺劇中奉旨談情，呢個超討好嘅組合真係有錢都唔會睇得番！
無論書讀多少於這一秒都再沒緊要～（網上圖片）
4.《先生貴性》
《先生貴性》係講述被暗殺而枉死嘅方思晴（陳慧珊飾）上鄧炳權（羅嘉良飾）身，更要鄧炳權扮成女人調查邊個係殺死自己嘅兇手！羅嘉良大大隻嘅男人身形要演出嗰份女人嘅嫵媚，真係少啲功力都唔掂！不過小編印象最深刻反而係郭少芸劇中作狀到爆嘅法文名「Francoise」，大家當年又有冇追呢？
誰共誰一～起！（網上圖片）
5.《再見亦是老婆》
《再見亦是老婆》中陳秀雯飾演一個以家庭為重心嘅肥師奶，原本同老公姜大偉同一對仔女非常幸福，但中途殺出年輕貌美嘅明星周嘉玲，令到佢老公拋妻棄子。但故事去到最後姜大偉都迷途知返，大團圓結局。可能未睇過呢套劇嘅你會鬧，「點解劇情咁『狗血』，咁都原諒個衰佬」，但事實係呢套劇令到好多師奶都喊得一句句，收視勁高，問世間情為何物～
過去已過～已飄去，留逝片段總念記～（網上圖片）
6.《洗冤錄》
《洗冤錄》嘅故事係以古代一個叫宋慈嘅真「驗屍官」做藍本，歐陽震華飾演嘅宋慈由細到大都係畀人叫「棺材仔」，覺得佢係「天煞孤星」，不過機緣巧合下佢學到驗屍技巧，更將技巧集合成一本《洗冤錄》，「讓屍體說話」！
得～一個人，單身一個我昂然獨行！（網上圖片）
撰文：黃蘊姿