2015年無綫重播經典神劇《大時代》，勾起大家集體回憶，同時，亦造就咗邵仲衡（飾丁孝蟹 ）嘅復出，更加將丁蟹四子「團聚」。邵仲衡、陶大宇、郭政鴻同吳啟明四個大男人不時都會聚會，邵仲衡話自己好熟悉其他三蟹嘅個性，佢嘅作用係將大家再重聚。
（《大時代》劇照）
邵仲衡慶幸自己由出道至今都有觀眾緣，暫別娛樂圈十幾年做生意，令佢可以見到唔同階層嘅人，所以非常「接地氣」，同觀眾「同聲同氣」。邵仲衡喺圈內圈外都相識滿天下，24號生日嘅佢去到尋日都仍然有慶祝活動，人緣超好！
（譚小環老公Facebook）
其實邵仲衡本身已經做咗16年越野車生意已經覺得「好悶」，所以早年已交了給手下接手，唔再做老闆了。因緣際會下，返出嚟重拾拍劇興趣。
（邵仲衡Facebook）
邵仲衡喺自己嘅社交網幾乎無所不談，工作、社會民生、政局、時事佢都勇於表達個人意見，唯獨是佢嘅私生活就隻字不提。佢保持低調係因為尊重家人私隱，所以佢好少會談及一對分別16及17歲嘅囝囝，亦從來冇分享家庭生活照曬幸福。
（邵仲衡Facebook）
邵仲衡指兩個仔都喺外國生活而且好注重私隱，亦建立咗各自嘅社交圈子，所以邵仲衡唔會分享家庭相影響佢哋。
（邵仲衡Facebook）
邵仲衡參考媽媽當年放牧式教養佢嘅模式嚟教自己一對仔，佢認為兩兄弟已經踏入青春期，有自己嘅想法。如果做爸爸太囉唆甚至訓話，只會搞到大家關係惡劣，反而用朋友式溝通就免傷和氣。
邵仲衡覺得亞洲父母經常犯一個錯誤，就是對孩子太過關注：
「你畀空間佢哋，佢哋自然會搵到機會發展興趣。我都是從香港嘅教育系統出嚟，就算喺外國讀中學時都只識得死讀書。」
邵仲衡話自己直到喺理工修讀室內設計嗰4年先真正學識自己點去計畫未來，所以佢認為唔使太早催谷子女。
仔大仔世界，各自各精彩！（邵仲衡Facebook）
撰文: 黃蘊姿