呢排好多網民話唔止普通人，連藝人都好鍾意改花名，例如Benz雄、三哥咁，被人稱呼花名次數幾乎仲多過本名，以下即刻為大家拆解藝人花名嘅由來！
1. Do姐-鄭裕玲
鄭裕玲屋企鬧鐘會發出「嘟嘟」嘅聲，佢細個會跟住咁叫，所以屋企人叫佢做「DoDo」。入咗行佢地位愈嚟愈高，所以由「DoDo」變做「Do姐」。
2. Benz雄-許紹雄
許紹雄喺麗的電視台返工，係第一個揸Benz嘅員工。嗰個年代有架車，仲要係名車好厲害，所以啲人咁叫佢。
3. 梁炳-梁漢文
佢喺《娛樂北斗星》成日話：「乜你咁娘炳架？」笑嘉賓老套，啲藝人唔服，就咁叫番佢。
4. 長腳蟹-呂慧儀
佢喺《原來愛上賊》呢套劇飾演長腳蟹，加埋佢隻腳真係長。
5. 校長-譚詠麟
有次佢同全場歌迷講：「紅館似萬人大學校，你哋每日都嚟返夜校，我覺得自己好似呢度嘅校長。」
6. 十三萬-萬綺雯
本身佢叫「萬二蚊」係中文名嘅讀音演變而成，「十三萬」係因為佢個編劇老公叫陳十三，佢哋糖黐豆咁，個名就合併咗。
7. 比比鳥、大文豪-周柏豪
有次佢打爛咗玻璃杯寫篇潮文，因此網友叫佢做「大文豪」，另外佢個髮型好似寵物小精靈中嘅比比鳥。
8. B餐-謝安琪
有篇潮文中話︰「如果A餐是5億身家加個徐濠縈，B餐是50萬身家(or less)加個謝安琪，我揀B餐。」引起網民熱議，不少人選擇B餐嘅謝安琪，所以佢叫「B餐」。
9. 万刀甲-方力申
網民改先，方力申三字除去頭頂部分。
10. 三哥-苗僑偉
佢喺1988年的電影《江湖接班人》中飾演退休的江湖大佬「三哥」李森一角。
11.靚靚-袁詠儀
袁詠儀參加1990年香港小姐競選，曾志偉講笑話佢由頭到腳冇個地方靚，唔明點解佢奪冠，但記者們繼續讚佢「好靚」，仲直接稱呼為「靚靚」。
12. 阿叻-陳百祥
出於佢英文名Natalis，之後佢又做過《黃飛鴻》電影中嘅石堅，凡事認叻。
13. 靚湯-湯洛雯
出自《學是學非》，因為佢個樣生得靚。
14. Mary姐-韓馬利
韓馬利英文名叫Emmanuel，意指「神與我們同在」，「Mary」係中文名「馬利」嘅中文翻譯。
15. 神之馬壯-黎諾懿
黎諾懿喺《愛‧回家》飾演馬壯，常常自稱為「最接近神嘅男人」。
(所有圖片來源：各大藝人instagram截圖、各大藝人微博截圖、TVB電視截圖)
撰文：張芷晴