【聲明】港生活網站並無進行電話推廣活動

新世界捐5.5萬個口罩畀少數族裔 大埔街坊義派4500支消毒棒

發佈時間: 2020/03/06

黛安同大家一樣,日日留意疫情發展。值得安慰嘅係見到唔少善心團體同市民發揮個人力量,為有需要人士籌集口罩等防疫物品。好似早幾年組成嘅「大埔街坊泥鯭」社區群組,一班義工星期三晚向區內居民免費派發共4,500支消毒棒。

黛安聽群組發起人Albert分享,佢話當晚雖然落微雨,但義工們臨時應變,向燒烤場借來太陽傘擋雨,又呼籲街坊着衣雨及帶雨傘,非常窩心。義工又呼籲家中有多餘口罩嘅街坊捐獻物資,再由義工轉贈畀區內有需要嘅長者及前綫清潔工友,繼續宣揚社區分享理念同鄰里互助精神。前晚佢哋已收集咗2,000多個口罩及其他消毒用品,亦喺泰國團購咗2,000盒口罩,希望今個月辦第2次分享活動。

另外,公關姊妹又話畀黛安知,新世界發展日前特別向香港族裔共融聯會捐出防疫物資,包括5.5萬個口罩、500支搓手液及1,000個抗炎包,派畀少數族裔朋友。新世界執行副主席兼總經理鄭志剛(Adrian)話,疫情喺香港爆發初期,已透過慈善基金捐出$1,000萬成立「社區抗疫基金」,至今已派發超過100萬個口罩。多得香港有咁多善心朋友同機構,出錢出力,同港人一齊抗疫。

撰文: 黛安 消息特靈八卦公關
欄名: 八卦名利場