《龍珠》抗疫法爆紅 盤點7隻「龍」字股

新冠肺炎疫情肆虐，玄學家李居明近日屢出奇招，以玄學角度教大家對抗疫情，其中更因「龍字抗疫法」洗版，他指屬龍、牛生肖可避此劫，並倡全港電視台重播動畫《龍珠》化解疫情，引來大量網民熱議。當然玄學之說見仁見智，不過講起「龍」字的股票，原來數一數手指都唔少。香港就有34間「龍字輩」上市公司，不過大部分都係交投疏落嘅小型股，但都有幾隻大家耳熟能詳，一講起就醒起「原來係佢」。

以下龍字股純粹回應「龍字」新抗疫法，乃非專業投資角度分析，能否抗疫並無投資理論及數據支持。

九龍倉集團 (00004)、九龍倉置業 (01997)

提起早前會德豐私有化事件，股民一定會一併想起呢對九龍倉孖寶，其中九龍倉置業係藍籌股。但今次私有化主角唔係呢對孖寶，而且市場對會德豐私有化反應欠佳而導致呢對孖寶股價受壓，復牌後更曾經一度急跌。其實九倉選擇係疫情期間重組，某程度上都算係抗疫行為，令股民有機會搭「私有化」順風車炒返轉。

九龍建業 (00034)

中小型本地地產商，派息算高，有接近8厘。個名叫得九龍建業，據官網資料旗下商用物業真係全部係九龍，始創中心、信和中心、旺角中心一期、半島中心同麥花臣匯。

玖龍紙業 (02689)

玖龍音同九龍，但此玖龍來自內地，是內地紙業最大龍頭。可能有人以為抗疫搶廁紙會有利紙業股，但係玖龍主要業務其實係商用及包裝紙，佔銷售收入超過8成。

網龍 (00777)

網龍為一家以遊戲及教育為重心發展的公司，理論上食到在家工作及學習條水。不過，旗下手遊未有與龍字抗疫主力《龍珠》聯乘，著實令人有點失望，否則抗疫力或者可以進一步強化。

同程藝龍 (00780)

中國在線旅遊平台，有騰訊及攜程投資，牌面幾威。內地旅遊業受疫情衝擊當然大，網上旅行社（OTA）好少少，取消酒店、航班機票只是少一些生意，真正大損失係經營酒店同航綫嘅航空公司承擔。

龍湖集團 (00960)

一間中國房地產開發公司，近年南下進軍香港地產巿場，作為內房股都有加入抗疫行列，旗下商場的所有商戶由1月25日（年初一）至3月31日期間租金費用減半。

{{hket:inline-image name="0306WLfeaturepage175.jpg"}}{{/hket:inline-image}}

同場加映：「牛」也助抗疫？

李師傅話唔止龍，牛都可以散熱毒，牛肉裏面有鋅，有助增強體質，可以防病。

蒙牛乳業 (02319)

香港上市公司中有個「牛」字，就只有蒙牛乳業，而佢作為內地乳業龍頭，的確有為抗疫出力，每日捐助奶類製品俾武漢前線醫護人員，截至2月20日，蒙牛乳業通過中華慈善總會向抗疫一線捐贈款物已累計落地5.4813億元人民幣。

編輯：唐婉琦

＊編者並無持有相關股票

免責聲明：投資者在做任何投資決定前，務須審慎，若有任何損失，概與晴報及編者無關。

接收全方位穩健財富管理資訊，請讚好「健康財富 Wealthy Life」Facebook

https://fb.com/Wealthylifehk/