袁文傑是典型的高大靚仔模特兒，在無綫藝員訓練班畢業、在亞視發跡的他拍過無數劇集，為亞視不少大型綜藝節目擔任司儀，不過論到網友心目中他的代表作卻是「家明表哥」和「游生」。「家明表哥」是袁文傑初初入行的一個客串工作，經典賀歲電影《家有囍事》要找來超高大的人飾演毛舜筠的男友，當時只是一個背影的鏡頭，但袁文傑形容這是一個奇妙的「追星行動」。
他說：「當我知會跟張國榮（哥哥）演對手戲，將珍藏的寫真集統統帶去片場，當日我著件西裝外套，點知哥哥發現我未扣好鈕，主動幫我扣返，好難忘佢講咗一句：『不修邊幅點做小生呀？』」他記起當時哥哥邀請他入大明星的休息室，又為他的珍藏簽名，袁文傑說：「哥哥問我最鍾意邊張相，可以幫我簽多個，我亳不猶豫一揭，就係89年夏天推出《SALUTE》嘅相，好瀟灑又帶點朦朧，佢好開心，因為佢都鍾意呢一張。」
袁文傑1995年加入亞視，火速走紅，他直言對上位沒有太大的野心：「對我而言我只係電視台嘅一位藝人，但我好感恩有我嘅恩師，香港武俠劇之父蕭笙先生，喺我加入亞視無耐就安排我拍《雪花神劍》，竟然可以同我偶像徐少強、姜大衞、米雪、龔慈恩合作，陳煒同楊恭如演我女朋友，呢個陣容實在可一不可再。」
相關新聞：《大醬園》奸爆專員戲鬥吳岱融張國強 袁文傑急穿越變「玄彬」洗底？
(圖片：《晴報》羅灝駿、楊嘉傑、黃紫維攝)
(圖片：《晴報》羅灝駿、楊嘉傑、黃紫維攝)
電影《家有囍事》中的「家明表哥」正是袁文傑的背脊。(圖片：網上截圖)
在亞視17年來，袁文傑的工作不斷。(圖片：袁文傑FB)
在亞視工作17年的袁文傑不認為機遇較少，但論入屋的相信是轉投無綫不久就遇上《不懂撒嬌的女人》中「游生」的角色，慶幸的是他讓媽媽看到自己成功，因為對他而言，媽媽是生命中非常重要的人。「咁多年來都係同媽媽同住，就算拍完通宵戲返屋企，媽媽會準備好早餐，將琴晚煲好嘅湯翻熱畀我飲，好多日與夜都係咁。直至2016年，坊間好多報道話TVB會找幾位亞視出身嘅藝人過檔，媽媽睇到報道已經非常緊張，尤其係有兩位已經公開表明已經簽約，佢好緊張同難過，點解自己個仔冇份？佢比我更相信我係食呢行飯，佢比我更著緊我嘅事業。」
劇中「游生」的角色令袁文傑再次彈起。(圖片：《不懂撒嬌的女人》電視截圖)
袁文傑多年來一直跟媽媽生活，她的離開實在難以接受。(圖片：袁文傑FB)
可惜，袁文傑的媽媽在2018年10月不幸離世，對他而言是相當之大的打擊，原定跟女友張潔蓮（Jackeline）12月舉辦的婚禮都擱置。當時因工作未能抽身陪媽媽走最後一程，正是袁文傑的遺憾，他說：「媽媽離開時我唔喺醫院，我坐緊外景車出去拍攝，已經半途落車飛的趕去，但真係趕唔切。我記得當時電梯門一打開，我率先見到Jackeline，佢好冷靜。直至後來弟婦同我講，之前佢不斷大聲叫住媽媽，話我趕緊去，希望佢等埋我，一邊喊一邊大叫。」
袁文傑和Jackeline拍拖9年，非常恩愛。(圖片：袁文傑FB)
(圖片：袁文傑FB)
(圖片：袁文傑FB)
兩人痛心告別愛貓囝囝，攬住喊過不停。(圖片：袁文傑FB)
袁文傑感恩Jackeline陪伴他經歷過情緒的低谷，媽媽離開幾個月後，愛貓囝囝又因癌症而病危，他說：「當時拍緊《大醬園》，囝囝情況又唔太好，記得有日收工下晝返屋企，我見到地板到處是血水。好采拍攝完畢，我有大半個月時間陪佢走到最後。Jackeline不斷撫摸囝囝,就算囝囝斷氣後，佢都抱實不捨得放手。」
雖然媽媽的離世令婚禮擱置，但袁文傑認為兩件事的發生，令他跟拍拖9年的Jackeline的關係再次昇華，他說：「感恩我同Jackeline依家係兩為一體嘅角色，坦白講，如果廿幾歲嘅Jackeline同廿多歲嘅袁文傑相遇，絕對唔係好事，係因為我養動物之後，心胸擴闊咗，好多執著都放低咗，呢個時間大家遇上，正是最好嘅時機。原本籌備好妥當的婚禮因媽媽嘅離開被迫擱置，我好感恩佢冇催迫過我，佢好明白我心情，兩個人相愛喺埋一齊就足夠，Jackeline都好認同。」
(圖片：《晴報》羅灝駿、楊嘉傑、黃紫維攝)
(圖片：《晴報》羅灝駿、楊嘉傑、黃紫維攝)
(圖片：袁文傑FB)
在劇集《大醬園》中，袁文傑飾演奸爆的專員大受讚賞。(圖片：《大醬園》電視截圖)
撰文：楊安莉
攝影：羅灝駿、楊嘉傑、黃紫維
場地：Amelia Hong Kong