《流行經典50年》余子明揸筆搵食難掩非凡歌喉 唱盡東南亞轉行拍戲拍足44年

現年76歲嘅藝人余子明90年代尾起開始經常擔任甘草角色，出演一啲老智者、太監角色，演出咁多電視劇，你哋又知道佢初入行時係歌手嗎？最新一集《流行經典50年》請到余子明上嚟大唱經典金曲《榕樹下》，佢真係歌喉了得，又有台型，唔輸比依家當紅嘅一班歌手㗎！

{{hket:inline-image name="ccx.jpg"}}{{/hket:inline-image}}

(影片截圖)

{{hket:inline-image name="ew.jpg"}}{{/hket:inline-image}}

(影片截圖)

余子明入行前係港聞記者，1968年參加星島晚報舉行嘅「全港業餘歌唱比賽」，凡參加者都有兩張門票。余子明當時係為免費聽歌而參賽，結果意外得到季軍，因緣際會之下，做埋夜總會駐場歌星，仲同徐小鳳同場演出。後來余子明唱遍各大小夜總會，又到東南亞各地走埠登台，直到76年先正式加入無綫成為合約演員，一直演戲到依家。

{{hket:inline-image name="tumblr_pp2ix1YH8U1u03abq_1280.jpg"}}{{/hket:inline-image}}

《封神榜》演姜子牙一角形象深入民心（網上圖片）

{{hket:inline-image name="images.jpg"}}{{/hket:inline-image}}

（網上圖片）

余子明話人生最大嘅成功，就係聽媽媽意見，娶太太馮素雲入門。余子明當時同馮素波到印尼登台，波姐帶埋妹妹一齊去，二人朝夕相對，日久生情下撮成一段姻緣。其後馮素雲想買份禮物，感謝余子明當時嘅照顧，咁啱送禮時是余子明媽媽嘅壽宴。余媽媽一見到馮素雲就好滿意，讚佢有教養有禮貌，樣靚又有福氣，叫個仔快啲娶佢。日講夜講之下，余子明決定聽媽媽話，一個月之後就同馮素雲結婚。

相關新聞：馮素波古天樂因一劇結深厚情義 男神掃百張門票贈長者免費睇騷

{{hket:inline-image name="s_600.jpeg"}}{{/hket:inline-image}}

余子明同太太馮素雲（網上圖片）

最搞笑係由於馮素波同馮素雲兩姊妹樣貌相似，加埋波姐同佢經常合作，直到現在，都有人認為波姐先係余子明太太。甚至乎當時余子明結婚派帖，朋友同記者都打電話鬧佢，話佢連老婆名都印錯，真係講到余子明口水都乾去解釋！

{{hket:inline-image name="005M25Lsgy1g78pc8mqilj313y0u0n84.jpg"}}{{/hket:inline-image}}

馮素波經常被誤會同余子明係夫妻（微博圖片）

婚後馮素雲持家有道，為余子明生咗兩仔一女，一家相當幸福美滿。到後來余子明又為家人做另一個賭博，就係全家移民到加拿大，依家三個仔女學有所成，阿女又生咗個可愛外孫畀佢湊，余子明嘅人生都圓滿啦！

{{hket:inline-image name="4-40_600_600.jpg"}}{{/hket:inline-image}}

（網上圖片）

撰文：羅慧怡