衛詩雅惡補日文做熟女

雖然近期減少港人遊日，但衛詩雅（Michelle）在新片《熟女愛漫遊》飾演一名旅遊KOL，因拍拖13年的男友突提出分手，於是她決定到日本展開一場失戀治癒之旅。Michelle在開拍前需要惡補日文，她自爆︰「雖然角色熱衷日本文化，但日文都係半桶水，所以導演無要求我講流利日文。其實我同日本演員做對手戲，都唔太聽得明，好彩戲入面我成日有部繙譯機跟身，我都用佢嚟同日本crew溝通，物盡其用！」

提到Michelle最深刻的一場戲，她穿上萌爆士多啤梨蛋糕造型，為街頭美食車宣傳，當她等埋位時，竟然瞬間吸引路人目光，紛紛舉機拍照。她表示︰「日本好興呢啲公仔頭造型，大家都覺得好得意，但無諗過自己會變成景點，平時同Fans合照就多，咁嘅奇遇真係第一次，我同導演講如果每影一張相有錢收，分分鐘賺到碗拉麵！」