開拓本土特色景點 康泰推「港人遊港」

全球疫情嚴峻，黛安暫時都唔敢外遊。聽聞康泰旅行社最近推出一系列特色本地遊旅行團同自由行，鼓勵被取消行程嘅朋友透過本地遊重新認識香港。

康泰上星期四安排咗員工考察旅遊目的地，去咗荔枝窩、吉澳同鴨洲等等，員工到大自然可以減下壓，佢哋仲自發清理郊外垃圾，執咗10幾袋垃圾包括口罩、紙巾等等，由員工一一帶走！

公關姊妹話，新冠肺炎重挫旅遊業，單靠本地遊雖然唔可以重振業界，但至少可以帶起市道氣氛。佢哋希望趁機重新檢討本港旅業發展，塑造更多具吸引力嘅本土景點，唔再單純聚焦喺內地客來港購物消費及購物主導嘅旅遊模式。