父母兒子相繼隔離 森美：唔知幾時一家團聚

新冠肺炎在歐洲多國爆發，森美正安排在英國留學的長子下周回港「避炎」，並將在家中隔離14天。森美昨日錄影《娛樂大家10點半》時，慨嘆父母剛完成隔離不久，稍後輪到兒子，坦言相當黑仔。

曾登上「鑽石公主號」郵輪的森美父母，日前才完成強制隔離回家休息，不過森美仍未鬆一口氣，因他的17歲長子梁曦樂將於下周由英國返港，並將配合新政策，回港後要隔離14日。森美昨日表示十分憂心：「無諗到咁黑仔，父母隔離完無耐，又輪到個仔。我啱啱由加拿大返嚟，依家都自我隔離，無同父母見面，原本等下星期夠14日，阿仔返港可以團聚。但依家輪到個仔隔離兩星期，咁樣梅花間竹，真係唔知幾時一家團聚。」

森美表示，幸好早已為兒子訂好機票，不用捱炒價：「好彩阿仔住郊區，見牛多過見人，只係擔心佢喺倫敦返嚟嗰陣，但上兩星期已經寄咗口罩畀佢上機用。」他表示兒子回港後，會留在家中隔離：「因為得一間屋，可能大家分開食飯，同埋會叫佢戴口罩，以及留喺自己房入面。」

林淑敏讚阿姐友善

另外，同場的「大小姐」林淑敏及「送水輝」許家傑，齊齊做《娛樂大家10點半》嘉賓玩大話遊戲。許家傑大爆林淑敏擔心被主持汪明荃（阿姐）責罵，林淑敏即大讚阿姐：「阿姐好照顧後輩，好多年前我演佢秘書，我唔記得帶劇本，阿姐主動借畀我。」

撰文︰Pauline

編輯：李潔盈

美術：梁政敏