現年只有24歲的周嘉洛憑《愛．回家之開心速遞》中「廢青安」一角爆紅，更奪得最佳男配角。劇中他是常常因為太蠢不小心弄出許多意外，但原來他真人也常常搞破壞，甚至整傷自己？
原來周嘉洛於讀書時期與同學玩捉迷藏時突然向後跑，當時戴了眼鏡的他撞到柱，鏡片爆開，眼眉被割傷，要入院縫針，險些毀容。如今他眼眉上的疤痕仍在，變成崩眉，只是上鏡可化妝遮住，但一素顏就能看到。
(周嘉洛instagram截圖)
中學畢業後，周嘉洛於2015年參加藝員訓練班，初入行時試過連續扮演黑幫大佬的手下，直至遇上《愛．回家》，他將廢青性格發揮得淋漓盡致。曾經有集講述廢青安遭阿媽熊尚善整蠱，被困充滿屎尿的廁所，為逃避他被迫全裸出醜。全因周嘉洛博命的演出，令該集收視高達26點，有幕後就爆料讚他肯捱肯搏：「佢好抵得諗，背晒劇本後，喺成棚人面前除剩條底褲，即場話除就除。嗰日天氣都幾凍，錄影廠冷氣又大，不過佢好勇，導演叫佢做乜，冇say no。」周嘉洛就坦言，屎比較嘔心，但脫衣是工作一部分，認為編劇都是為角色，劇情合理就不會抗拒。
(TVB電視截圖)
另外，亦有幕後透露當家小生愈來愈少，而且已上位的演員都想外闖，故為人正面樸實、有周星馳影子、與台前幕後關係好好的周嘉洛就成為可造之材，據知他被高層點名力捧，更指他有如初出道的馬國明，非行靚仔路線，但有演技與形象入屋：「佢入行就簽無綫，咁快畀獎佢除咗套劇受歡迎，公司要捧新血上位，揀聽話有潛質！」所以，周嘉洛受盡萬千寵愛，如今戲份被加重日日拍到無停手，成為當旺小生。
(呂慧儀instagram截圖)
近日，周嘉洛接受Do姐鄭裕玲的商台節目《口水多過浪花》時，就謙虛否認是馬國明接班人：「呢個太美譽...我唔覺得自己上緊位，我冇將呢件事睇得好重，因為我知道自己仲有好大進步空間，所以我都係繼續努力做好自己。」他表示自己甚忙碌，自覺幸運：「好多人想做都冇得做，所以好值得珍惜，更加要用心做。我覺得自己係TVB有史以嚟最幸運，有好多我冇預期過嘅機會嚟咗。」他續言：「最巔峰嘅幾年應該就係做金城安呢幾年，佢嘅生命其實豐富過我。」
被問到現在很多師奶都鍾意上他？周嘉洛說：「唔只家庭主婦連小朋友都鍾意我，再加上有人叫我金城安又或叫我廢青安，我都當作讚賞。」片酬上漲方面，周嘉洛就說一直都交予經理人處理，自己並不是太清楚。
(鄭裕玲instagram截圖)
撰文：張芷晴