養和堂下周送涼茶券 助港人提升免疫力

除咗要齊心抗疫、注重個人衞生外，更要增強抵抗力！黛安收到風，本地涼茶館老字號「養和堂」下星期一（30日）同星期二（31日），將舉行「疫境自強街站送券」活動，到時會喺九龍同新界3個地點免費派發涼茶券，以實際行動為香港人加油！

公關姊妹話，希望藉今次活動，可以引起更多人關注抗疫同健康嘅重要性。今次送出嘅涼茶有好多款，包括針對流感嘅抗疫茶、提升免疫力嘅潤肺化痰靈芝羅漢果茶等，全部喺香港自設廠房炮製，日日新鮮，絕無防腐劑㗎。

黛安平日都經常飲涼茶，今次活動梗係唔會錯過啦！下星期一（30日）下午1點，大家可以喺觀塘駿業街空地，又或同日下午3點半喺旺角朗豪坊對出空地攞番張免費涼茶券！否則下星期二（31日）下午3點，喺屯門大會堂對出空地都有得免費派發，派完即止；最新消息可以留意養和堂facebook專頁。