【實有共鳴】儲唔到錢的5大原因—使錢習慣大改造 令儲到首期不再是夢

政府上年已將9成按保放寬至樓價800萬以下，加上近期樓價有所回落，以5至600萬2房單位上車，對於有穩定收入的中產人士，其實並非難過登天，只不過唔少中產人士都呻未夠首期上車，其實歸根究底原因不在乎「搵得多使得亦多」。以下列舉5個最常見嘅儲唔到錢原因，睇吓你中邊幾樣？

原因1：租樓

香港地衣食住行，最貴就係「住」，而且係全球最貴。樓價貴，大把人租樓住，租金亦一直高企不下，如果已婚要搬出來住又買唔起樓，租樓是唯一辦法，想要減少租金真係非常之困難，住客唯有量力而為，選擇租金比較平嘅地區或住得細啲，又或者計過有能力一筆過俾一年租金，不妨大膽還價，多數業主都肯平一千幾百。

記住香港人多地少，地產商和業主永遠係贏家，如果有樓放租更加係大贏家。所以儲錢永遠愈早愈好，相信大家都會認同儲錢嘅「黃金時間」，就係同父母同住時，相比自己出來租樓，儲錢速度係兔同龜嘅分別。

原因2：旅行

香港人可能係全世界最鐘意去旅行嘅人，唔少中產人士一年去旅行3至4次係基本，但只要計算一下每年旅行總開支，再乘以十，你就會知道筆買樓首期去咗邊，同埋點解儲咗十年錢都係上唔到車？

當然唔係叫大家完全唔去旅行，咁樣人生仲有意義咩？但凡事都有緩急輕重，如果為咗買樓，旅行減半到每年1至2次得唔得？再唔係寧願請多啲假，都要淡季先出發又得唔得呢？到時每年旅行開支減到一半，買樓大計隨時早幾年實現。而且趁而家疫情影響，可以預先習慣一下無得去旅行嘅感覺，因為好似戒煙咁，一時間好難完全戒甩，當一段時間之後「忍忍吓就會慣」。

{{hket:inline-image name="0330WLshutterstock_709307929700.jpg"}}{{/hket:inline-image}}

▲如果為咗買樓，旅行減半到每年1至2次得唔得？

原因3：訂閱/課金/購物

而家好流行訂閱，Netflix、Spotify、iTunes等等，玩手遊又好興課金，仲未計網購淘寶，相關開支每月隨時過千蚊。咁你要問自己，如果有更重要目標（買樓）要實現，呢一類花費係咪可以暫時放棄先？因為所有辛苦上到車嘅人都會話你知，當有朝一日達成置業大計，擁有一個屬於自己嘅安樂窩，即使要幾年無乜娛樂/花費，都一定會覺得係值得。

原因4：完全不投資/亂投資

就算唔識得投資，最少都要投資債券或做定存。因為市場有通脹，如果筆錢留來做首期不需要動用，放係利息近乎零嘅活期戶口，只會一直眨值。但另一方面，如果亂投資，例如買股票只聽人云亦云而高追低賣，隨時連辛苦儲落嘅首期都蝕埋。所以又係𠴱句量力而為啦！

原因5：家用

事先聲明，如果已經獨立出來工作，俾家用係天公地道。只不過家用其實都要量力而為，例如剛結婚搬出去租樓住，生活開支即時大增，而如果又有儲首期買樓嘅大計，就不妨開心見誠同父母商量，相信大部分父母都想子女成功買到樓，有可能家用肯減啲，又或者就算唔減，雙方都有共識日後儲到某個數時，到時父母再幫吓手上車。講真而家好少為人子女嘅，能夠完全唔靠父（母）幹而上到車。

編輯：唐婉琦

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/