中電網課教學生安全用電及環保知識

全港停課至今，唔少學校都利用網上教學方式，讓學生停課不停學。黛安最近收到風，中華電力有限公司亦整合咗一系列網上學習教材，畀學生在家都學到環保及電力知識，內容既豐富又有趣。

黛安聽公關姊妹介紹，好似幼稚園嘅網上學習系列，就分為節約能源、用電安全及電力與日常生活3個主題，全港幼稚園老師同家長都可以喺超人「中中」facebook專頁，或下載超人「中中」App，使用《看到的電力》幼稚園教材套，內有發聲故事書、動畫短片和兒歌，仲可以同幼童齊齊玩網上遊戲！

另外，中華電力亦向85間參與中電綠優校園認證計劃嘅小學，提供10個網上教學及活動範本，全港小學生都可以挑戰「綠戰士」環保教育網站內嘅環保任務及遊戲，強化環保意識兼學習用廢物再造小手工。中華電力企業發展總裁莊偉茵話，希望停課期間能協助老師進行網上教學，等學生可以繼續汲取環保知識。