《法證先鋒IV》上周播畢大結局，雖然劇集一度換角及押後推出，但無阻粉絲的追捧。事實上，開播首集收視已達33點，打破TVB八年紀錄，1至24集七天跨平台總收視錄得35.8點，昨日公布最新收視，第26集更高達40點，打破近六年劇集單集收視紀錄，超越11年《法證先鋒III》大結局一集的39.9點；加上劇情懸疑，各個角色都表現搶鏡，難怪觀眾都高呼再開續集。
近日有指原本以退休調理身體為由的總監製梅小青已答應開拍《法證先鋒V》，《晴報》向小青姐查證時，她說︰「未算係真。」雖然大賣關子，但劇集有此佳績，相信開拍續集只是遲早問題。若開拍《法證先鋒V》，大家會想哪位演員加入《法證》團隊？本報訪問多位藝人，其中有份參演《法證》系列的陳煒和陳展鵬都力撑元老歐陽震華回歸再破奇案。
《法證先鋒》系列在06年播出第一輯，當時有歐陽震華（Bobby）、林文龍、鍾嘉欣和蒙嘉慧等小生花旦孭飛，而《法證》系列一直拍到第四輯，劇中一眾骨幹演員，以至單元個案的演出者亦相當有分量，當中包括鄭嘉穎、佘詩曼、黎耀祥、胡定欣、蕭正楠、陳展鵬等，難怪拍到第四輯，收視依然高企。日前有傳無綫已拍板開拍《法證先鋒V》，又指小青姐急改《法證IV》結局埋下伏綫為《法證V》鋪路，更有指會邀請鍾嘉欣和佘詩曼回巢助陣；對此傳聞，小青姐只承認兩人都是她喜愛的演員。不過，原來不少藝人亦有《法證V》的心水選擇，他們的人選又會否跟你的相同?
煒哥恨同Bobby做情侶
陳煒在《法證IV》中飾演法證事務部科學鑑證主任，她就「睇中」《法證》元老歐陽震華（Bobby），更指名要與Bobby演情侶談談情。煒哥曾在《東坡家事》與Bobby合作過，她大讚對方私底下好玩得，「不過佢曾經極力話自己唔會再拍，等我幫佢解開心結，等佢可以衝破心理關口！（想同Bobby在劇中是甚麼關係？）梗係情侶啦！其實秋官（鄭少秋）都可以玩到好癲，不過同秋官就唔好做情侶，做父女啦。」
展鵬讚Bobby深入民心
在《法證III》其中一個單元「獨木舟會連環死亡案」中飾演臨床心理學家的陳展鵬，也覺得《法證》系列的單元故事十分吸引，加入不同演員也能擦出新火花，他跟陳煒一樣，最想歐陽震華重返《法證V》，「佢絕對深入民心！今輯黃浩然同譚俊彥都做得好好呀，其實單元故事可以畀觀眾新鮮感，又可以回味劇情。」展鵬表示如果小青姐再搵他拍《法證V》，一定有興趣加入！
林夏薇渴望古天樂客串
古天樂（古仔）曾演出多套無綫劇集，已踏足影圈多年的他，仍是不少觀眾期待重現熒幕的演員，而林夏薇跟大部分觀眾一樣，十分期待古仔再拍劇，更希望他加入《法證V》，她說︰「一直認為拍電影嘅人拍電視劇會幾好睇，古天樂都好耐無返TVB拍劇，如果佢客串一個單元應該幾吸引，可以產生唔同火花。古仔拍任何角色都咁有型，就算反串都靚過人！（想演情侶？）梗係想，其實有對手戲已經好滿足。」
譚俊彥想同修哥演爺孫
在《法證IV》中飾演高級督察的譚俊彥（Shaun），就對多位資深演員都情有獨鍾，他說︰「好似羅蘭姐、修哥（胡楓），仲有汪阿姐都好想同佢哋合作，上次拍《失憶24小時》同修哥合作，佢仲好精靈，記對白好叻㗎，佢喺劇中飾演我公公，有場戲佢摸我塊面，因為我的公公多年前已過身，所以修哥呢一摸，我啲眼淚不停喺面上流，好想同修哥再續爺孫緣。（想唔想爸爸狄龍大哥加入？）佢退休喇！而且佢好執着，加上身體狀況，同佢合作我會好大壓力，不如大家輕鬆啲啦！」
採訪︰Pauline
編輯：黃寶恩
美術：梁政敏