新冠肺炎疫情肆虐，人人為咗避疫都留喺屋企。日前黃秋生唔知係咪多咗時間喺屋企，所以開始清理佢嘅收藏品，今日佢仲分享一張「古董」相，仲瞬間吸咗過千Like，網絡人氣超強！
（圖片：黃秋生facebook）
秋生其實早喺2017年已經用社交網完成咗一個「不可能任務」。當時佢上載佢仲係嬰孩時同父母嘅合照，表示想搵番親生父親。過咗一年竟然畀佢成功千里尋親。
（圖片：黃秋生facebook）
2018年英國廣播公司(BBC)報道事件，令網民再次關注秋生尋父事件，黃秋生當時再發文，指有心人幫佢搵到爸爸嘅資料，仲得知秋生爸爸當年同太太仲育有一名女兒及一對孖仔。
最終喺BBC安排下秋生終於見到兩位孖生親兄John及David！秋生同兩位兄長見面嘅時候忍唔住大嗌：「好開心呀！點會發生喺我身上㗎！Amazing! Impossible! Miracle!好似畀雷劈咁，反應唔到過嚟。」
原來兩個哥哥係喺BBC新聞見到爸爸抱住秋生嘅合照，又指父母從來都未有向佢哋提及秋生，不過當知道咗之後，經過討論決定嚟到香港搵秋生。
秋生第一眼見兩個哥哥就已經唔覺得好生外，而兄長二人坦言本身唔知秋生嘅背景，於是上網搵到秋生嘅電影、片段等，知道佢係一個成功演員：「若果爸爸知道我哋重遇，佢都一定好安慰。我哋好開心可以同秋生做兄弟！」John及David更形容三兄弟係「三劍俠」。
秋生同兩個哥哥一見如故。(網上圖片)
秋生指爸爸曾經喺信入面講，如果佢係一個Good boy，爸爸就會幫佢搞掂所有嘅嘢：「我諗佢依家覺得我係Good boy喇啩，所以佢咪Send兩個大佬嚟畀我囉。」
呢次相聚令秋生性格徹底改變，更將佢一直以來孤獨嘅脾性擺低咗：「以前好易忟憎，依家就忟之前會諗一諗。」
（圖片：黃秋生facebook）
秋生笑指自己變得平和反而嚇親老婆同兩個仔，就連朋友都對佢嘅改變覺得費解：「愈隨和愈驚，搞到唔知點同人講嘢好，但我真係做唔番以前，喺老婆面前就係Yes Man，兩個仔依家會同我講道理，佢哋似老竇多。」
（圖片：黃秋生facebook）
秋生除咗身世離奇之外，自己後生時嘅感情生活都有啲複雜。秋生前年驚爆有一個私生子William，William同太太所生嘅細仔同齡。秋生指當年自己「病到七彩」，又同太太有啲衝突，而當時William嘅生母對佢非常地好，二人就產生咗感情。秋生指當時William生母有咗BB，但佢冇話畀太太知。
秋生同阿仔William(網上圖片)
不過，有一日William媽媽忽然抱住BB搵秋生話要交畀佢，件事就穿煲。秋生惟有同太太「攤牌」，幾乎離婚：「太太忍咗我好多年，為咗下一代，做父母做戲都要做下去，一直做下去就會有好事發生。」 秋生話冇離婚係佢呢世人做得最啱嘅事。
撰文：黃蘊姿